ಕವನ: "ಈ ಪ್ರಪಂಚ"

ಈ ಪ್ರಪಂಚಕ್ಕೆ ಕಾಲಿಡುತ್ತಿದ್ದೇನೆ ನಾ

ನನ್ನ ಒಂದೊಂದು ಕಣ್ಣು 
ತೋರಿಸುತ್ತಿದೆ ಒಂದೊಂದು ನೋಟವನ್ನು.

ತೋರಿಸುತ್ತಿದೆ ಕಣ್ಣೊಂದು ನನಗೆ

ಸುತ್ತಲೂ ನಗುವನ್ನು

ಎಲ್ಲೆಡೆ ಬಲಿಷ್ಟತೆಯನ್ನು

ಅಡಕವಾಗಿರುವ ಸೌಂದರ್ಯವನ್ನು

ಆವರಿಸಿರುವ ಐಕ್ಯತೆಯನ್ನು 

ಸುತ್ತಮುತ್ತಲೂ ಖುಷಿಯನ್ನು!

ಅನಾವರಿಸುತ್ತಿದೆ ಇನ್ನೊಂದು ನನಗೆ

ಸೂರಿರದ ಜನತೆಯನ್ನು

ಹಸಿದ ಹೊಟ್ಟೆಗಳನ್ನು

ಆಶಾವಿಹೀನ ಮಕ್ಕಳನ್ನು

ಬಹಳಷ್ಟು ಅಸಹಾಯಕರನ್ನು

ನಿರ್ದಯಿ ವ್ಯವಸ್ಥೆಯನ್ನು

ಕರುಣೆ ಇಲ್ಲದ ಶ್ರೀಮಂತರನ್ನು

ಅಧಿಕಾರರಹಿತ ಬಡವರನ್ನು.

ನೋಡಬೇಕು ನಾ ಯಾವ ಕಡೆ?

ಇರಬೇಕು ನಾ ಯಾರ ಜೊತೆ?

ಖುಷಿಯಾಗಿರುವರ ಜೊತೆ ಇರಬೇಕಾ?

ನೊಂದವರ ಕೈಹಿಡಿಯಬೇಕಾ?

ಜೊತೆಯವರು ಸೂರಿಲ್ಲದೆ ಬದುಕುವಾಗ

ಹವಾನಿಯಂತ್ರಿತ ಕೋಣೆಯಲ್ಲಿರಬೇಕಾ?

ಬಹಳ ಮಂದಿ ಉರಿಬಿಸಿಲಿನಲ್ಲಿರುವಾಗ

ನಾ ಮಾತ್ರ ನೆರಳನಾಶಿಸಬೇಕಾ?

ಕೇವಲ ಕಣ್ಣಷ್ಟೇ ಎರಡು

ಆದರೊಳಗಿರುವ ಪ್ರಜ್ಞೆ ಒಂದೇ

ನ್ಯಾಯಪರತೆಯೂ ಒಂದೇ.

ನಾವ್ ಬದುಕುವುದು ಒಂದು ಆತ್ಮದೊಂದಿಗೆ,

ಒಂದು ಮನಸ್ಸು, ಒಂದು ಹೃದಯದೊಂದಿಗೆ

ಹಾಗಿದ್ದಾಗ, ಈ ಭುವಿಯಲ್ಲಿ

ಯಾವ ನೋಟ ನೋಡಬೇಕು

ಯಾವ ಹಾದಿ ತುಳಿಯಬೇಕು

ಯಾವ ರೀತಿ ಬದುಕಬೇಕು -

ಆಯ್ಕೆ ಮಾತ್ರ ನಮ್ಮದೇ ! 

- ನಿಲೀನಾ ಥಾಮಸ್

(ಅನುವಾದ: ಸುಧಾ.ಜಿ)