ಕಲ್ಪನೆ -

{ಚಿತ್ರವನ್ನು ನೋಡಿ ಕಲ್ಪನೆಯನ್ನು ಹರಿಬಿಟ್ಟಿದ್ದಾರೆ)

ಏನೂ ಇಲ್ಲ ಖಾಲಿಕೈ

           ಏನೂ ಇಲ್ಲ!  ದಿನಾ ಮುಸುರೆ ತೊಳೆಯೋ ಹೊತ್ತಿಗೆ ಮೂಗ್ಜೀವುಗ್ಳು ಮುಂದೆ ಬಂದ್ ನಿಂತ್ಕತವೆ ಏನ್ ಕೊಡ್ಲಿ ನಂಗೆ ಇಲ್ದಂಗಾಗೈತೆ. ಮಳೆ ಓಗಿ ಮುಗಿಲ್ಸೇರ್ತು ಗಂಗಮ್ಮೋಗಿ ಪಾತಾಳ ಸೇರವ್ಳೆ ನಾವೇನ್ತಿನ್ನಾದು ಮೂಗ್ಜೀವುಗಳ್ಗೇನು ಕೊಡಾದು.

ಮದ್ವೆ ಆಗಿ ನಾನೀ ಊರ್ಗ್ಬಂದಾಗ ಜಯಮಂಗ್ಳಿ ನದಿ ಜೀವ ನದಿ,ಬರ್ತಾ ಬರ್ತಾ ಮಳೇನೇ ಇಲ್ದಂಗಾಯ್ತು,ನದಿ ಒಣಗೋಯ್ತು ಈಗ ನೀರೂ ಇಲ್ಲ. ಮಳ್ಳೂ ಇಲ್ಲ,ಜಾಲಿ ವನ ಆಗೈತೆ.

             

ನದಿ ಹರಿಯವಾಗ ನಮ್ಮಡ್ಲೆಲ್ಲ ಬಂಗಾರದ ವನ ಆಗಿದ್ವು ಈಗೆಲ್ಲ ಬೆಂಗಾಡಾಗೈತೆ,

ನೀರ್ಕಮ್ಮೀ ಆಯ್ತೂಂತ ಬೋರ್ ಆಕ್ಸಿದ್ವಿ ಎಲ್ಡು ದಿನ ಬಂದು ನಿಂತೋದ್ವು, 

        ಸಾಲ ಆಯ್ತು ,ಅದನ್ನ ತೀರ್ಸಕೆ ಹುಡುಗ್ರು ಬೆಂಗಳೂರಗೆ  ಗರ್ಮೆಂಟ್ಸ್ ಓಗ್ತಾವೆ, ಸಣ್ಣ ಸಣ್ಣ ಕೂಲಿ ಕೆಲ್ಸ ಮಾಡ್ಕಂಡು ಇಲ್ಲೇ ಇದೀನಿ. 

ಬೆಳಿಗ್ಗೆ ಒಂದು ಮುದ್ದೆ ಮಾಡ್ಕಂಡು ಉಂಡು ಮುಸುರೆ ತೊಳಿಯೋವೊತ್ಗೆ  ಮೂಗ್ಜೀವುಗ್ಳು ಬಂದ್ ನಿಂತಕತಾವೆ ಏನು ಕೊಡ್ಲಿ ,ಕಳ್ಳು ಚುರುಕ್ ಅಂತೈತೆ.

    -    ವರದರಾಜು ಬ್ಯಾಲ್ಯ 

ಎಲ್ಲಿ ನಮ್ ತುತ್ತು

ಅಯ್ಯೋ ಅಮ್ಮ
ಎಲ್ಲಿ ನಮ್ ತುತ್ತು
ಖಾಲಿಪಾತ್ರೆ ತೊಳೆಯತ್ತಿರುವೆ ನೀ
ನಮ್ ಹೊಟ್ಟೆಗೆ ಇನ್ನೇನಿದೆ
ನಿನ್ ದಯೆ ಎಲ್ಲಿ ಅಮ್ಮ?

ಅಯ್ಯೋ ಕೊಟ್ಟು, ಪುಟ್ಟಿ, ನನ್ ಕುಟ್ಟಿ
ಎಲ್ಲಿದೆ ತುತ್ತು
ಏನೂ ಇಲ್ಲ ಈ ಅಮ್ಮನಿಗೂ
ಮನೆಯಲ್ಲಿ ನೆಂಟರು ಜಾಸ್ತಿ ಎಂದು
ನಂಗೂ ಕೊಟ್ಟಿಲ್ಲ ಒಂತುತ್ತೂ
ಬೇಸರವ್ಯಾಕೆ ನನ್ ಮಕ್ಕಳಾ
ಈ ಹಸಿವು ನಮಗೇನೂ ಹೊಸದಾ?
ಕುಡಿಯೋಣ ಇವತ್ತು ಬರೀ ನೀರು
ಕಣ್ಣೀರಿಗಿಂತ ಅದು ತಾನೇ ಒಳ್ಳೇದು
ಕಾಣುವ ನಾವೂ ಒಂದು ಹೊಸ ಕನಸು
ಒಂದೊತ್ತಿನ ಭರ್ಜರಿ ಊಟ!
   - ಶೀಬಾ