ಪರೀಕ್ಷೆಗಳ ಬಗ್ಗೆ
[ಅಮೇರಿಕಾದ ಇಂಗ್ಲಿಷ್ ಭಾಷಾತಜ್ಞರಾದ ನಾರ್ಮನ್ ಲೂಯಿಸ್ ರವರ ಲೇಖನದ ಅನುವಾದ]
ಪರೀಕ್ಷೆಗಳು ನಿಮ್ಮ ಆತ್ಮಸ್ಥೈರ್ಯವನ್ನು ಕುಂದಿಸಬಹುದಾಗಿದೆ. ಯಾವಾಗ ನೀವು ಒಂದು ಪರೀಕ್ಷೆಯನ್ನು ನಿಮ್ಮ ಮೌಲ್ಯವನ್ನು ನಿರ್ಧರಿಸುವ, ನಿಮ್ಮ ಗುಣಗಳನ್ನು ತೀರ್ಮಾನಿಸುವ ಅಥವಾ ನಿಮ್ಮ ಬುದ್ಧಿಶಕ್ತಿಯನ್ನು ಅಳೆಯುವ ಸಾಧನವೆಂದು ಭಾವಿಸುವಿರೊ, ಆಗ ನೀವು ಪರೀಕ್ಷೆಯನ್ನು ವೇದನಾದಾಯಕ ಅನುಭವವಾಗಿ, ಉದ್ವೇಗ ಸೃಷ್ಟಿಸುವ ಉಗ್ರಪರೀಕ್ಷೆ ಎಂದು ಪರಿಗಣಿಸುವಿರಿ.
ಒಂದು ವಿವೇಚನಾಯುಕ್ತ ಸಮಾಜದಲ್ಲಿ ಪರೀಕ್ಷೆಯೆಂದರೆ ಮೇಲೆ ಹೇಳಿದ ಯಾವ ವಿಷಯವೂ ಅಲ್ಲ. ನೀವು ಎಷ್ಟರ ಮಟ್ಟಿಗೆ ಕಲಿತಿದ್ದೀರೆಂದು ಅಳೆಯುವ ಸಾಧನವಷ್ಟೇ. ನೀವು ಪರೀಕ್ಷೆಯಲ್ಲಿ ಪಾಸು ಅಥವಾ ನಪಾಸು ಆಗುವುದಿಲ್ಲ. ಪಾಸು ಮತ್ತು ನಪಾಸು ಎಂಬ ಪದಗಳು ಎರಡು ಕೊನೆಗಳನ್ನು ತೋರಿಸುತ್ತವೆ. ನಿಮ್ಮ ಇಡೀ ಜೀವನವನ್ನು ದಾಳದ ಒಂದು ಎಸೆತದಲ್ಲಿ ತೀರ್ಮಾನಿಸಲಾಗದು.
ವಾಸ್ತವವಾಗಿ, ಪರೀಕ್ಷೆ ಎಂದರೆ ಒಂದು ಅಳೆಯುವ ಸಾಧನ. ಒಂದು ಕಾರಿನಲ್ಲಿ ಸೂಚಕವಿದ್ದಂತೆ. ಆ ಸೂಚಕದಲ್ಲಿ ನಿಮ್ಮ ಪೆಟ್ರೋಲ್ ಟ್ಯಾಂಕ್‍ನಲ್ಲಿ ಪೆಟ್ರೋಲ್ ಇದೆಯಾ, ನೀವೆಷ್ಟು ಕಿಲೋಮೀಟರ್ ಚಲಿಸಿದ್ದೀರಾ, ಬ್ಯಾಟರಿ ಸರಿಯಿದೆಯೇ ಇತ್ಯಾದಿಗಳನ್ನು ತೋರಿಸುತ್ತದೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ ಆ ಸೂಚಕ ಇನ್ನಷ್ಟು ಸಾಮರ್ಥ್ಯದಿಂದ ಚಲಿಸಬಹುದೆಂಬುದನ್ನು ಸೂಚಿಸುತ್ತದೆಯೇ ಹೊರತು ನಿಮ್ಮನ್ನು ಓರ್ವ ವ್ಯಕ್ತಿಯಾಗಿ ನಿಮ್ಮ ಮೌಲ್ಯವನ್ನು ಅಳೆಯುವುದಿಲ್ಲ.
ವಿವಿಧ ಪರೀಕ್ಷೆಗಳೂ ಸಹ ಅಷ್ಟೆಯೇ. ನಿಮಗೆ ಕೆಲವು ಮಾಹಿತಿಗಳನ್ನು ನೀಡಿ ಇನ್ನೂ ಹೆಚ್ಚು ಸಾಮರ್ಥ್ಯ ಬೆಳೆಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ವಿಶೇಷವಾಗಿ –
1. ನೀವು ಈಗಾಗಲೇ ಕಲಿತಿರುವುದನ್ನು ಇನ್ನಷ್ಟು ಗಟ್ಟಿಯಾಗಿಸುತ್ತದೆ. ಇಲ್ಲಿ ನಿಮಗೆ ನೀವು ಕಲಿತಿರುವುದನ್ನು ನೆನಪಿಸಿಕೊಂಡು ಬರೆಯಲು ಅವಕಾಶವಿದೆ.
2. ಯಶಸ್ವಿ ಓದುವಿಕೆಗೆ ಒಂದು ಮುಖ್ಯ ಸಾಧನ ಪರೀಕ್ಷೆ. ನಾನು ಇನ್ನೆಷ್ಟು ಕಲಿಯಬೇಕೆಂಬುದನ್ನು ಸೂಚಿಸುತ್ತದೆ.
3. ಪರೀಕ್ಷೆಗಳು ನಮ್ಮ ತಪ್ಪನ್ನು ತೋರಿಸುವುದರಿಂದ ಹೋಲಿಕಾ ದೃಷ್ಟಿಯಲ್ಲಿ ನಾವು ಯಾವ ವಿಷಯದಲ್ಲಿ ಕಡಿಮೆ ತಿಳಿದಿದ್ದೇವೆಂದು ಸೂಚಿಸುವುದರಿಂದ ಅವು ನಮ್ಮ ಕಲಿಕಾ ಸಾಮರ್ಥ್ಯವನ್ನು ಸೂಚಿಸುತ್ತವೆ. ಈ ಪ್ರಪಂಚದಲ್ಲಿ ಯಾವುದೂ ಮತ್ತು ಯಾರೂ ಶೇಕಡ 100ರಷ್ಟು ಸಾಮರ್ಥ್ಯವನ್ನು ಹೊಂದಿಲ್ಲ. ಆದರೆ ಬಹಳಷ್ಟು ಜನರಿಗೆ ತಮ್ಮ ಬಲಹೀನತೆ ಎಲ್ಲಿದೆ ಎಂದು ತಿಳಿದರೆ ತಮ್ಮನ್ನೆ ಉತ್ತಮಗೊಳಿಸಲು ಅವಕಾಶವಿದೆ. ಒಂದು ವೇಳೆ ಈ ಪರೀಕ್ಷೆಯಲ್ಲಿ ನೀವು ಕಡಿಮೆ ಅಂಕ ಗಳಿಸಿದರೆ, ನೀವು ಎಲ್ಲಿ ತಪ್ಪು ಮಾಡುತ್ತಿದ್ದೀರಾ, ಹೆಚ್ಚಿನ ಅಂಕ ಗಳಿಸಲು ಎಲ್ಲಿ ನೀವು ಹೆಚ್ಚು ಶ್ರಮಿಸಬೇಕು ಎಂಬುದನ್ನು ಮಾತ್ರ ಅದು ಸೂಚಿಸುತ್ತದೆ.
4. ಪರೀಕ್ಷೆಗಳಿಂದಾಗುವ ಇನ್ನೊಂದು ಸಹಾಯವೆಂದರೆ ‘ಸಾಧಿಸಿದ ಸಂತೋಷ’. ನಿಮ್ಮ ಅಂಕಗಳು ಎಷ್ಟೇ ಆಗಲಿ, ಅದೇ ನಿಮ್ಮ ಸಾಧನೆ. ಏನೂ ತಿಳಿಯದೆ ಇರುವಂತಹ ಪರಿಸ್ಥಿತಿಯಿಂದ ಇಲ್ಲಿಯವರೆಗೂ ಬಂದಿದ್ದೀರಿ ಎಂದರ್ಥ. ಈಗ ಇದರ ಆಧಾರದ ಮೇಲೆ ಇನ್ನಷ್ಟು ಪರಿಶ್ರಮದಿಂದ ಇನ್ನೂ ಉತ್ತಮವಾಗಿ ಕಲಿಯಲು ಸಾಧ್ಯ.
- ಅನುವಾದ - ಸುಧಾ ಜಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ