[ಇಂಗ್ಲಿಷ್ ನಲ್ಲಿ ಎ.ಹಮದನ್ ಬರೆದಿರುವ
ಗ್ರಿಟ್ ಕಥೆಯ ಕನ್ನಡ ಅನುವಾದ]
ಕೆಲವೊಂದು ಕಾರ್ಯಗಳು ಅವುಗಳ ಧೀರೋದಾತ್ತತೆಯಿಂದಾಗಿ ಆಶ್ಚರ್ಯದಾಯಕವಾಗಿರುತ್ತವೆ. ಅನಾಸ್ತಾಸೀಯಾ ಚೌಸ್‍ಳ ಕಥೆಯೂ ಹಾಗೆಯೇ ಇದೆ. ಅವಳ ಸ್ನೇಹಿತೆಯರೆಲ್ಲ ಅವಳನ್ನು ನಾಸ್ತ್ಯಾ ಎಂದು ಚಿಕ್ಕದಾಗಿ ಕರೆಯುತ್ತಿದ್ದರು. ಆಕೆ ಓರ್ವ ಸಾಧಾರಣ ಕಾರ್ಮಿಕಳು. ಅವಳು ದ್ವಿತೀಯ ಜಾಗತಿಕ ಯುದ್ಧದ ಸಮಯದಲ್ಲಿ ಸೆವಾಸ್ತಪೋಲ್‍ನಲ್ಲಿ ಶಸ್ತ್ರಾಸ್ತ್ರಗಳ ಬಿಡಿಭಾಗಗಳನ್ನು ತಯಾರಿಸುವ ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿದ್ದಳು.
ಆ ಜಾಗದಲ್ಲಿ ಬಾಂಬ್‍ಗಳು ಭಯವನ್ನುಂಟುಮಾಡುವ ಶಬ್ದದೊಂದಿಗೆ ಸತತವಾಗಿ ಬೀಳುತ್ತಿದ್ದವು. ಅವುಗಳ ಸ್ಫೋಟದಿಂದಾಗಿ ಭೂಮಿ ನಡುಗುತ್ತಿತ್ತು. ನಾಸ್ತ್ಯಾ ಭಯದಿಂದ ನಡುಗುತ್ತಿದ್ದ ಹೃದಯದೊಂದಿಗೆ ತನ್ನ ಯಂತ್ರದ ಮುಂದೆ ಕುಳಿತಿದ್ದಳು. ಉಸಿರಾಡುವುದೂ ಕಷ್ಟವಾಗಿತ್ತು. ಹತ್ತಿರದಲ್ಲಿಯೇ ಬಾಂಬ್ ದಾಳಿಯಿಂದ ಸುರಕ್ಷಿತವಾಗಿರುವ ತಾಣವಿತ್ತು. ಅವಳು ಅಲ್ಲಿ ಹೋಗಿ ದಾಳಿ ಮುಗಿಯುವವರೆಗೂ ಕುಳಿತುಕೊಳ್ಳಬಹುದಿತ್ತು. ಆದರೆ ಅವಳು ಅಲ್ಲಿ ಪೇರಿಸಿಟ್ಟಿದ್ದ ಬಿಡಿ ಭಾಗಗಳನ್ನು ನೋಡಿದಳು. ಅವು ತಕ್ಷಣವೇ ರಣಾಂಗಣದಲ್ಲಿ ಬೇಕಾಗಿದ್ದವು.
“ಕಡಿಮೆ, ಇದು ಬಹಳ ಕಡಿಮೆ” ತನಗೆ ತಾನೇ ಹೇಳಿಕೊಂಡಳು. “ನಾನು ಇಲ್ಲಿಯೇ ಇದ್ದು ಕೆಲಸ ಮಾಡುತ್ತಾ ಹೋಗಬೇಕು. ನಮ್ಮ ಹುಡುಗರು ಮಾತ್ರ ಶತ್ರುಗಳು ದಾಳಿ ಮಾಡಿದಾಗ ಅವರ ಸ್ಥಾನಗಳನ್ನು ಬಿಟ್ಟು ಓಡಿ ಹೋಗುವುದಿಲ್ಲವಲ್ಲ” ಎಂದುಕೊಂಡು ತನ್ನ ಕೆಲಸ ಮುಂದುವರೆಸಿದಳು. ಅವಳ ಪಕ್ಕದಲ್ಲಿ ನೆಲದ ಮೇಲಿದ್ದ ರಾಶಿ ಎತ್ತರೆತ್ತರಕ್ಕೆ ಏರುತ್ತಲೇ ಹೋಯಿತು.
ಪ್ರತಿನಿತ್ಯ ಈ ಹುಡುಗಿ ವಿಶ್ರಾಂತಿಯನ್ನು ತೆಗೆದುಕೊಳ್ಳದೆ ತನ್ನ ಕೆಲಸದ ಅವಧಿಯುದ್ದಕ್ಕೂ ದುಡಿಯುತ್ತಿದ್ದಳು. ಅವಳಿಗೆ ವಿಶ್ರಾಂತಿ ಬೇಕಿರಲಿಲ್ಲ. ನಗರವನ್ನು ಆಕ್ರಮಿಸಲಾಗಿತ್ತು, ದೇಶ ಅಪಾಯದಲ್ಲಿತ್ತು. ಇದು ವಿಶ್ರಾಂತಿಯ ಸಮಯವಾಗಿರಲಿಲ್ಲ. ಅವಳಿಗೆ ಭಯ ಹೊರಟುಹೋಯಿತು. ಅವಳು ಎಚ್ಚರಿಕೆಯ ಘಂಟೆಗಳಿಗೆ, ಬಾಂಬ್‍ನ ಆರ್ಭಟ, ಸ್ಫೋಟಕ್ಕೆ, ಚೀತ್ಕಾರಕ್ಕೆ, ಗುಂಡಿನ ಚಕಮಕಿಯ ಸದ್ದಿಗೆ ಒಗ್ಗಿಹೋದಳು. ಇವು ಯಾವುದೂ ಅವಳನ್ನು ಅವಳ ಕೆಲಸದಿಂದ ಬೇರೆ ಮಾಡಲು ಸಾಧ್ಯವಾಗಲಿಲ್ಲ. ಅವಳ ಮನಸ್ಸು ಅವಳ ಕೆಲಸದಲ್ಲಿ ಲೀನವಾಗಿತ್ತು. ಬಿಡಿಭಾಗಗಳು ಪರಿಪೂರ್ಣವಾಗಿರಬೇಕಿತ್ತು, ಅವಳು ಒಂದನ್ನೂ ಕೂಡ ಹಾಳು ಮಾಡುವಂತಿರಲಿಲ್ಲ.
ಆದರೆ ಒಂದು ದಿನ ನಾಸ್ತ್ಯಾ ಬಾಂಬ್ ಸ್ಫೋಟಕ್ಕೆ ಬಲಿಯಾದಳು ಮತ್ತು ಅದರಿಂದಾಗಿ ಅವಳ ಎಡಗೈಯನ್ನು ಕತ್ತರಿಸಬೇಕಾಯಿತು. ಅದು ಅವಳಿಗೆ ತೀವ್ರ ಹೊಡೆತವಾಗಿತ್ತು. ಅವಳು ಬಹಳಷ್ಟು ಅತ್ತಳು. ಒಂದೇ ಕೈಯಿಂದ ಯಾರು ಏನನ್ನು ಮಾಡಲು ಸಾಧ್ಯ? ಆಸ್ಪತ್ರೆಯಿಂದ ಅವಳನ್ನು ಕಳಿಸಿದಾಗ, ಅವಳಿಗೆ ಸೆವಾಸ್ತಪೋಲ್‍ಅನ್ನು ಬಿಡುವಂತೆ ಸಲಹೆ ನೀಡಲಾಯಿತು. ಆದರಳವಳು ಅದನ್ನು ನಿರಾಕರಿಸಿದಳು.
ಅದೇ ದಿನ ಅವಳು ತಾನು ಹಿಂದೆ ಕೆಲಸ ಮಾಡುತ್ತಿದ್ದ ಫ್ಯಾಕ್ಟರಿಯ ಛೇರ್ಮನ್‍ನನ್ನು ನೋಡಲು ಹೋದಳು. ಪುನಃ ಕೆಲಸ ಮಾಡಲು ಅವಕಾಶ ಮಾಡಿಕೊಡುವಂತೆ ಮನವಿ ಮಾಡಿಕೊಂಡಳು. ಕೆಲಸಗಾರರ ತೀವ್ರ ಅವಶ್ಯಕತೆ ಇದ್ದುದ್ದರಿಂದ, ಜೊತೆಗೆ ಈ ಹುಡುಗಿಯ ದೃಢಸಂಕಲ್ಪವನ್ನು ಗೌರವಿಸುತ್ತಾ ಆ ಹುಡುಗಿಗೆ ಕೆಲಸ ಮಾಡಲು ಆತ ಅವಕಾಶ ಮಾಡಿಕೊಟ್ಟನು.
ಆರಂಭದಲ್ಲಿ ಒಂದೇ ಕೈಯಿಂದ ಕೆಲಸವನ್ನು ಮಾಡುವುದು ಅವಳಿಗೆ ಬಹಳ ಕಷ್ಟವಾಯಿತು. ಆದರೆ ವೈಮಾನಿಕ ದಾಳಿ ಮತ್ತು ಬಾಂಬ್ ದಾಳಿಯ ಮಧ್ಯದಲ್ಲಿಯೇ ಕೆಲಸ ಮಾಡುತ್ತಿದ್ದದ್ದು ಅವಳನ್ನು ಸದೃಢಗೊಳಿಸಿತ್ತು. ಹಲ್ಲು ಕಚ್ಚುತ್ತಾ, ಕೆಲಸವನ್ನು ತಾಳ್ಮೆಯಿಂದ ಮುಂದುವರೆಸಿದಳು. ಕ್ರಮೇಣವಾಗಿ ಅವಳ ಉತ್ಪಾದನೆ ಹೆಚ್ಚಾಗತೊಡಗಿತು. ಸಾಮಾನ್ಯ ಉತ್ಪಾದನೆಯಲ್ಲಿ ಶೇಕಡ 30, ನಂತರ 40, 50, ಕೊನೆಗೆ ಮೊದಲು ಮಾಡುತ್ತಿದ್ದಷ್ಟನ್ನೆ ಮಾಡಲಾರಂಭಿಸಿದಳು. ಆ ದಿನ ಅವಳಿಗೆ ಅತ್ಯಂತ ಸಂತೋಷದಾಯಕವಾಗಿತ್ತು. ಅವಳೊಂದಿಗೆ ಇಡೀ ಫ್ಯಾಕ್ಟರಿ ಸಂತೋಷದಲ್ಲಿ ಭಾಗಿಯಾಯಿತು.
ಆದರೆ ಅವಳಿಗೆ ಇಷ್ಟರಿಂದಲೇ ತೃಪ್ತಿಯಾಗಲಿಲ್ಲ. ಅವಳಿಗೆ ತನ್ನ ಜವಾಬ್ದಾರಿ ದ್ವಿಗುಣಗೊಂಡಿದೆ ಎನಿಸಿತ್ತು. ರಣಾಂಗಣದಲ್ಲಿದ್ದ ಕೆಂಪು ಸೈನ್ಯಕ್ಕೆ ಹೆಚ್ಚುಹೆಚ್ಚು ಶಸ್ತ್ರಾಸ್ತ್ರಗಳು ಬೇಕಿದ್ದವು. ಕ್ರಮೇಣವಾಗಿ ಅವಳು ಎಂದಿಗಿಂತ ಹೆಚ್ಚಾಗಿ ತಯಾರು ಮಾಡತೊಡಗಿದಳು.
ಅಂದಿನ ಕಟು ದಿನಗಳ ಜೀವನದ ಶ್ರಮ ಮತ್ತು ಹೋರಾಟದ ತಾಳಕ್ಕನುಗುಣವಾಗಿ ಈ ಅಂಗವಿಕಲ ಮಹಿಳೆಯ ಪ್ರಯತ್ನಗಳನ್ನು ಇಡೀ ಫ್ಯಾಕ್ಟರಿ ಗಮನಿಸಿ ಆಶ್ಚರ್ಯಗೊಂಡಿತು ಮತ್ತು ಅವಳ ಯಶಸ್ಸಿನಿಂದ ಸಂತಸಗೊಂಡಿತು.
ನಾಸ್ತ್ಯಾ ತನ್ನ ಕೆಲಸದ ಪ್ರತಿ ಚಲನೆಯನ್ನು ಲೆಕ್ಕ ಹಾಕುತ್ತಿದ್ದಳು, ಉಪಕರಣಗಳು ತನ್ನ ಕೈಗೆಟಕುವಂತೆ ಹತ್ತಿರದಲ್ಲಿ ಇಟ್ಟುಕೊಳ್ಳುತ್ತಿದ್ದಳು ಮತ್ತು ಯಂತ್ರಕ್ಕೆ ತ್ವರಿತವಾಗಿ ಅದನ್ನು ಇಡುತ್ತಿದ್ದಳು. ಅದೇನು ಸುಲಭವಾಗಿರಲಿಲ್ಲ, ಆದರೆ ಅದನ್ನವಳು ಸಾಧಿಸಿದಳು. ಅವಳ ಉತ್ಪಾದನೆ ಶೇಕಡ 150, ನಂತರ 200, 250ಕ್ಕೆ ಏರಿ, ಅಂತಿಮವಾಗಿ ಶೇಕಡ 350ಕ್ಕೆ ಬಂದು ನಿಂತಿತು!!
ಅವಳ ಜೊತೆಗಾರರು ಹೇಳಿದರು: “ಅದು ಕೇವಲ ಎದೆಗಾರಿಕೆ. ನಾಸ್ತ್ಯಾ ಛಲವಾದಿ ಹುಡುಗಿ. ಅವಳ ಸ್ಥೈರ್ಯದಿಂದಾಗಿಯೇ ಅವಳು ಇಷ್ಟನ್ನು ಮಾಡಲು ಸಾಧ್ಯವಾಯಿತು” ಎಂದರು.
ಆಗಾಗ್ಗೆ ವೈಮಾನಿಕ ದಾಳಿ ಮಾಡುವುದರಿಂದ ಸೆವಾಸ್ತಪೋಲ್‍ನ ರಕ್ಷಣಾಕಾರರ ನೈತಿಕತೆಯನ್ನು ಮುರಿಯಬಹುದೆಂದು ಶತ್ರು ಭಾವಿಸಿದ್ದ. ಒಂದೇ ಕೈಯಿದ್ದ ನಾಸ್ತ್ಯಾ ಅವನ ಲೆಕ್ಕಾಚಾರ ತಪ್ಪೆಂದು ಸಾಬೀತುಪಡಿಸಿದಳು. ಅವಳ ಉದಾಹರಣೆ ನೂರಾರು ಕಾರ್ಮಿಕರಿಗೆ ಸ್ಫೂರ್ತಿ ನೀಡಿತು. ಇಡೀ ನಗರದಲ್ಲವಳು ಮನೆಮಾತಾದಳು. ಅವಳು ಓವರ್‍ಕೋಟ್ ಮತ್ತು ರೇಷ್ಮೆ ಫ್ರಾಕ್‍ನೊಂದಿಗೆ ತ್ವರಿತವಾಗಿ ನಡೆಯುತ್ತಿದ್ದರೆ ಬಹಳಷ್ಟು ಜನ ಸ್ನೇಹಪೂರ್ವಕವಾಗಿ ಅವಳಿಗೆ ವಂದಿಸುತ್ತಿದ್ದರು.
ಒಂದು ದಿನ ನಗರದಲ್ಲಿ ಸೆವಾಸ್ತಪೋಲ್‍ನ ಮಹಿಳಾ ರಕ್ಷಣಾಕಾರರ ಸಮ್ಮೇಳನ ನಡೆಯಿತು. ಅಲ್ಲಿ ನರ್ಸ್‍ಗಳು, ಮೆಷಿನ್ ಗನ್ನರ್ಸ್, ಸಿಗ್ನಲ್ ಕೊಡುವವರು, ಸರ್ಜನ್ನರು, ಯಂತ್ರ ಕಾರ್ಮಿಕರು ಮೆಕಾನಿಕ್‍ಗಳು, ಬಟ್ಟೆ ಕಾರ್ಮಿಕರು, ವೈದ್ಯರು, ಶಿಕ್ಷಕರು, ಟ್ರಕ್ ಡ್ರೈವರ್‍ಗಳು, ಇಲೆಕ್ಟ್ರಿಶಿಯನ್‍ಗಳು ಮತ್ತು ಇತರ ವೃತ್ತಿಯ ಮತ್ತು ಕಸುಬಿನ ಮಹಿಳೆಯರಿದ್ದರು. ಸಭಾಂಗಣ ತುಂಬಿಹೋಗಿತ್ತು. ನಾಸ್ತ್ಯಾಳು ಮುಖ ಕೆಂಪಗೆ ಮಾಡಿಕೊಳ್ಳುತ್ತಾ, ಸಂಕೋಚದಿಂದ ವೇದಿಕೆಯ ಮೇಲಿನ ಗೌರವದ ಸ್ಥಾನವನ್ನು ಅಲಂಕರಿಸಿದಳು. ಸೆವಾಸ್ತಪೋಲ್‍ಅನ್ನು ರಕ್ಷಿಸುತ್ತಿದ್ದ ಕೆಂಪು ಸೈನ್ಯದ ಜನರಲ್ ಇಡೀ ಸಭಾಸದರ ಕರತಾಡನದ ಮಧ್ಯದಲ್ಲಿ ನಾಸ್ತ್ಯಾಳ ಕೈಕುಲುಕಿ “ಆರ್ಡರ್ ಆಫ್ ದಿ ರೆಡ್ ಸ್ಟಾರ್” (ಕೆಂಪು ನಕ್ಷತ್ರದ) ಪದಕವನ್ನು ನೀಡಿ ಗೌರವಿಸಿದರು.
- ಸುಧಾ ಜಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ