ಕವನ - ಅವಳು

ಇಂದು ಮುಂಜಾವಿನಲಿ
ಅವಳ ನೋಡಿದ ಕ್ಷಣದಿಂದ
ಬರೆಯಬೇಕೆನಿಸಿದೆ...
ಅವಳ ಬಗ್ಗೆ...,
ಅವಳ ಮಾತು,
ನೋಟ.......,
ಇವೆಲ್ಲದರ ಬಗ್ಗೆ!!

ತಡೆಯದಾಗಿದೆ ಮನಸು
ಹಾಕಲೇಬೇಕು ಹೊರಗೆ
ಮನದ ಮಾತುಗಳ..

ಎಂದಿನಂತೆ ಇಂದೂ,
ಎದ್ದೆ, ಸ್ನಾನ, ತಿಂಡಿ.
ಹೊರಬಿದ್ದೆ.....,
ಆದರೆ,
ಅವಳ ಚಿತ್ರಣ,
ಕಣ್ಣ ತುಂಬಿದೆ.
ಆಡಿದ ಮಾತು
ಎದೆಯ ಮೇಲಿದೆ.

ಅವಳ ನಾ ನೋಡಿದಾಗ
ನಾ ದಿನವೂ ನೋಡುತಿದ್ದ
ಮನೆಗೆ ಹೋದಳು.

ಹತ್ತಿರವಾಗುತಿದ್ದಂತೆ
ನಾನಲ್ಲಿಗೆ
ಗೇಟು ದಾಟಿ
ಹತ್ತಿರ ಬಂದಳು

ಅವಳ ನೋಡಿದೆ
ನೋಡಿಯೂ ನೋಡದಂತೆ!!

ಬಲಗೈಯಲ್ಲಿ
ಪುಟ್ಟ ಪ್ಲಾಸ್ಟಿಕ್ ಹಾಳೆಯ ಗಂಟು.
ಅದರ ಮೇಲೆ
ಮಾಸಿದ ಇಪ್ಪತ್ತರ ನೋಟು.
ಎಡಗೈಯಲ್ಲಿ
ಊರುಗೋಲು.
ಮಾಸಿಹೋಗಿತ್ತು
ಅವಳಂತೆ..,
ಅವಳ ಬಟ್ಟೆ, ನೋಟದಂತೆ!!

ಬೆನ್ನ ಮೇಲೆ,
ಭಾರವಿಲ್ಲದಿದ್ದರೂ
ಹೊರಲಾರದೆ ಹೊತ್ತ
ಬಟ್ಟೆ ಗಂಟು
ಬಾಗಿದ ಸೊಂಟ
ಮೈ ಹಣ್ಣುಹಣ್ಣಾಗಿ
ಸುಕ್ಕುಗಟ್ಟಿತ್ತು...

ಕೈ ಚಾಚುವಳೇನೋ...,
ಎಂದುಕೊಂಡೆ.
ಇಲ್ಲ!! ಚಾಚಲಿಲ್ಲ!!

ಆಗಲೇ
ಎದೆಯ ಹೊಕ್ಕಿದ್ದು
ಅವಳ ಮಾತು..,

ನನ್ನೆಡೆಗೆ ದೃಷ್ಟಿ ಬೀರಿ
ಹೇಳಿದಳು
ತನ್ನೊಳಗಿದ್ದೆಲ್ಲವನ್ನೂ
ಹೊರ ಹಾಕುವಂತೆ..,

"ಏನ್ ಮಾಡ್ಲಿ ರೀ ಯಪ್ಪಾ,
ಹೊಟ್ಟಿ ಕೇಳ್ಬೇಕಲ್ಲಾ .....??"

- ಮಹಾಂತೇಶ ಬಿ ಬಿ