ರಾಜ್ಯವಷ್ಟೇ ಯಾಕೆ, ಇಡೀ ದೇಶ ಸುತ್ತಾಡಿ ಬನ್ನಿ. ಮನಸೋ ಇಚ್ಛೆ ಕಂಡಿದ್ದಕ್ಕೆಲ್ಲ ಖರ್ಚು ಮಾಡಿ. ಆದರೆ 5 ರೂಪಾಯಿ ಮೌಲ್ಯ ತಿಳಿಯಬೇಕಿದ್ದರೆ, ಕಲಬುರ್ಗಿ ಸುತ್ತಮುತ್ತ ರೌಂಡ್ ಹಾಕಿ. ದೇಶದ ಇತರ ಪ್ರದೇಶಗಳಿಗೆ ಹೋಲಿಸಿದರೆ, ಈ ಭಾಗದ ಜನರಿಗೆ 5 ರೂಪಾಯಿ ಜೊತೆಗಿನ ನಂಟು ತುಸು ಜಾಸ್ತಿಯೇ ಇದೆ. ಇಲ್ಲಿನ ಸಮೀಪದ ಕೆಲ ಸ್ಥಳಗಳಿಗೆ ನಿರಾತಂಕವಾಗಿ ಆಟೋದಲ್ಲಿ ಹೋಗಬೇಕಿದ್ದರೆ ಅಥವಾ ಖಡಕ್ ಚಹಾ ಕುಡಿದು refresh ಆಗಬೇಕಿದ್ದರೆ, 5 ರೂಪಾಯಿ ಸಾಕು.
ಹಾಗಂಥ ಅವು ಅಂತಿಂಥ ಆಟೋಗಳು ಅಲ್ಲ. ಆಟೋ ಚಾಲಕರ ಪಕ್ಕದಲ್ಲೇ ಕೂರಬಹುದು. ಚಾಲಕರಿಗೆ ಇನ್ನಷ್ಟು ದುಡಿಯುವ ಮನಸ್ಸು ಮತ್ತು ಪ್ರಯಾಣಿಕರ ಮೇಲೆ ಪ್ರೀತಿಯಿದ್ದಲ್ಲಿ, ತಮ್ಮ ಅಕ್ಕಪಕ್ಕ ಕೂರಿಸಿಕೊಳ್ಳುತ್ತಾರೆ. ಅಂದ್ರೆ, ಒಂದು ಸೀಟು, ಮೂರು ಸವಾರಿ!
ಕೊಂಚ ಅವಸರ, ದಾಢಸಿ ಅಥವಾ ಸಾಹಸಿ ಜನರಿದ್ದರೆ, ಇನ್ನೂ ಒಂದು ಹೆಜ್ಜೆ ಮುಂದೆ. ಅವರು ಚಾಲಕರ ಸೀಟಿನ ಎರಡೂ ಬದಿಯಲ್ಲಿರುವ ಪುಟಾಣಿ ಕಬ್ಬಿಣದ ಕಟ್ಟೆ ಮೇಲೆ ಕೂರುತ್ತಾರೆ. ಇದರರ್ಥ ಚಾಲಕರ ಪುಟ್ಟ ಕ್ಯಾಬಿನ್ ನಲ್ಲಿ ಐದು ಮಂದಿ ಪಯಣ. ಕಾಲೇಜ್ ಹುಡುಗರಿಗಂತೂ ಹುಡುಗಿಯರಿಗೆ impress ಮಾಡಲು ಹೀರೋಯಿಸಂ. ಮಧ್ಯವಯಸ್ಕರಾದರೆ, ಸುರಕ್ಷಿತವಾಗಿ ತಲುಪಿದರೆ ಸಾಕು ಎಂಬ ಗಾಂಭೀರ್ಯ.
ಇನ್ನೂ ಆಸಕ್ತಿಮಯ ವಿಷಯವೆಂದರೆ, ಕೆಲ ಪ್ರಯಾಣಿಕರಿಗೆ ವಿಶೇಷ ರಿಯಾಯಿತಿಯೂ ಇದೆ. ಅವರು ಕೆಲವೊಮ್ಮೆ 3 ಅಥವಾ 4 ರೂಪಾಯಿ ಕೊಟ್ಟು ಹೊರಟು ಬಿಡುತ್ತಾರೆ. ಇಷ್ಟಕ್ಕೆಲ್ಲ, ಯಾಕೆ ರಗಳೆ ಮಾಡೋದು ಅಂತ ಅವರ ಬಗ್ಗೆ ಒಂಚೂರು ಕೆಟ್ಟದ್ದು ಸಹ ಮಾತನಾಡದೇ ಹೊಸ ಪ್ರಯಾಣಿಕರನ್ನು ಹುಡುಕುತ್ತ ಚಾಲಕರು ಹೊರಡುತ್ತಾರೆ. 'ಜಿಂದಗಿ ಯಹಿ ಖತಂ ನಹೀ ಹೋತಿ, ಸಫರ್ ಮೇ ಔರ್ ಭಿ ಲೋಗ್ ಮಿಲೇಂಗೆ' ಎಂಬ ಆಶಾಭಾವ ಅವರದ್ದು. (ಜೀವನ ಇಲ್ಲಿಗೇ ನಿಲ್ಲುವುದಿಲ್ಲ, ದಾರಿಯಲ್ಲಿ ಇನ್ನೂ ಜನ ಸಿಗುತ್ತಾರೆ)
ಹೋಟೆಲ್ ಹೊರತುಪಡಿಸಿ ಇಲ್ಲಿ ಯಾವುದೆ ಮೂಲೆಯಲ್ಲಿ ಕೂತು ಅಥವಾ ನಿಂತು ಚಹಾ ಕುಡಿದರೆ, ಖರ್ಚಾಗೋದು 5 ರೂಪಾಯಿ ಮಾತ್ರ. ಅದಕ್ಕೆಂದೇ ಇಲ್ಲಿ ಣeಚಿ ಠಿoiಟಿಣ ಗಳಿವೆ. (ಟೀ ಮಾರುವ ಸ್ಥಳಗಳು) ಗಾಣಗಾಪುರ, ಕಲ್ಯಾಣ ಕರ್ನಾಟಕ ಮತ್ತು ಬೇರೆ ಬೇರೆ ಹೆಸರಿನ ಈ ಟೀ ಪಾಯಂಟ್ಗಳಲ್ಲಿ ಬೆಳಿಗ್ಗೆ 5 ರಿಂದ ರಾತ್ರಿ 10.30ರವರೆಗೆ ಚಹಾ ಸಿಗುತ್ತದೆ. ರೈಲು ನಿಲ್ದಾಣ ಬದಿಯಿದ್ದರಂತೂ 24 ಗಂಟೆ ಚಹಾ ಕುಡಿಯಬಹುದು. ತಿಂಡಿಯೂ ತಿನ್ನಬಹುದು. the railway station never ಸ್ಲೀಪ್ಸ್ here (ಇಲ್ಲಿ ರೈಲುನಿಲ್ದಾಣ ಮಲಗುವುದೇ ಇಲ್ಲ) ಅಲ್ಲಲ್ಲಿ 10 ರಿಂದ 15 ರೂಪಾಯಿಯೊಳಗೆ ತಿಂಡಿ ಸಿಗುತ್ತದೆ. ಜೇಬಿನಲ್ಲಿ ಒಂದಿಷ್ಟು 10 ರೂಪಾಯಿ ನೋಟು, 5 ರೂಪಾಯಿ ನಾಣ್ಯವಿದ್ದರೆ ಸಾಕು. ತಿಂಡಿ ತಿಂದು, ಚಹಾ ಕುಡಿದು, ಬಯಸಿದ ಸ್ಥಳದತ್ತ ಆಟೋದಲ್ಲೂ ಪ್ರಯಾಣಿಸಬಹುದು.
ಇದು ಕಲಬುರ್ಗಿ ದೇಶಿ ಲೈಫ್ ಸ್ಟೈಲಿನ ಪುಟ್ಟ ಪರಿಚಯ. ತನ್ನ ಒಡಲಲ್ಲಿ ಇಟ್ಟುಕೊಂಡಿರುವ ಇನ್ನಷ್ಟು ಸಂಗತಿಗಳನ್ನು ಹೆಕ್ಕಿ ಅರಿಯಬೇಕಿದೆ. ಇಲ್ಲಿಯದ್ದೇ ಭಾಷೆಯಲ್ಲಿ ಹೇಳಬೇಕೆಂದರೆ, 'ಗುಲಬರ್ಗಾ ಮೇ ಹಮಾರೆ ಸಂಗ್ ಜರಾ ಜೀ ಕೆ ತೋ ದೇಖೋ'... (ಗುಲ್ಬರ್ಗಾದಲ್ಲಿ ನಮ್ಮ ಜೊತೆ ಸ್ವಲ್ಪ ಬದುಕಿ ನೋಡಿ)
- ವಿಸ್ಮಯ್
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ