ಕವನ - ತಿಂಗಳ ಅತಿಥಿ

ತಿಂಗಳಿಗೊಮ್ಮೆ ಬರುತ್ತಿದ್ದಳು

ಹುಣ್ಣಿಮೆ ಚಂದ್ರನಂತೆ

ಕಾವ್ಯದ ಪ್ರಾಸದಂತೆ

ತಂಗಾಳಿಯ ಮಂದಹಾಸದಂತೆ

ಆಕೆ ಬಂದಾಗಲೆಲ್ಲ

ಸಂತಸದ ವಸಂತ, ಕನಸುಗಳು ಅನಂತ

ತುಂಬಿದ ಜೋಳಿಗೆ, ಹೊಟ್ಟೆ ತುಂಬ ಹೋಳಿಗೆ

ವರುಷಕೊಮ್ಮೆ ಅವಳ ಬಸಿರು

ಮನದಲ್ಲಿ ನಿಟ್ಟುಸಿರು ಮನೆಯೆಲ್ಲ ಹಚ್ಚ ಹಸಿರು

 ಆಕೆ ಬಾರದ ಅಮವಾಸೆಗೆ

ತಣ್ಣಗಾದ ಒಲೆ,ಅಲ್ಲಾಡಿದ ನೆಲೆ

ನುಚ್ಚು ನೂರು ಕನಸು,ವಿಚಲಿತ ಮನಸು

ಕೊನೆಯಿಲ್ಲ ಗೋಳಿಗೆ, ಆಸರೆಯಿಲ್ಲ ಬಾಳಿಗೆ

ಆಕೆ ಬರುವಳೆಂಬ

ಶರತ್ ಕಾಲದ  ಬೆಳ್ಳನೆ ಮೋಡದ ಆಸೆ

ಆಕಾಂಕ್ಷೆಗಳ ಆಗರ,ಭರವಸೆಗಳ ಸಾಗರ

ಆಕೆ ಬಾರದ ಬಿಸಿಲ ಭಯ

ಎಲ್ಲವೂ ಕಲ್ಲೋಲಮಯ

ಅದೇಕೋ ಈ ಬಾರಿ ಬರುವಳೋ ಬಾರಳೋ ಗೊತ್ತಿಲ್ಲ

ಧರೆ ಹೊತ್ತಿ ಉರಿಯುತ್ತಿದ್ದರೂ

ಒಲೆ ಹತ್ತಿ ಉರಿಯುತ್ತಿಲ್ಲ

ಮೋಡಗಳೂ ಕಂಡಿಲ್ಲ ಹನಿ ನೀರೂ ಸುರಿಸಿಲ್ಲ

ಸುರಿಸಿಯಾಗಿದೆ ಬೆವರು

ಮೈ ಕೈಯೆಲ್ಲಾ ಕೆಸರು

ಆದರೂ ಬಾಯಿಗೆ ಬಾರದ ಮೊಸರು

 

ತಿಂಗಳಾದರೂ ಆಕೆ ಬಂದಿಲ್ಲ

ಮನೆಗೆ ಸಾಮಾನು ತಂದಿಲ್ಲ

- ಡಾ.ಸುಚೇತಾ ಪೈ