1. ವೃದ್ಧಾಶ್ರಮಕ್ಕೆ ತಾತನನ್ನು ಬಿಟ್ಟು ಬಂದ ಅಪ್ಪನನ್ನು ಅವನ ಪುಟ್ಟ ಮಗ ಕೇಳಿದ "ಅಪ್ಪ, ನಾನು ದೊಡ್ಡವನಾಗುವುದು ಯಾವಾಗ?"
2. ಆಗ ತಾನೆ ಜನಿಸಿದ ಹೆಣ್ಣುಮಗುವನ್ನು ಕಂಡು ಮುಖ ತಿರುಗಿಸಿದ ಅಪ್ಪನನ್ನು ಕಂಡ ಮಗು, "ನಾನು ಮಾಡದ ತಪ್ಪಿಗೆ ನನಗೆ ಶಿಕ್ಷೆಯೆ?" ಎಂಬಂತೆ ಅಮ್ಮನೆಡೆಗೆ ನೋಡಿತು!!
3.ಜೀವನದ ಬೇಕುಬೇಡ, ಆಗುಹೋಗುಗಳ ಬಗ್ಗೆ ತಿಳಿಸುತಿದ್ದವಳಿಗೆ ನಗುತ್ತಾ ಹೇಳಿದಳು ಗೆಳತಿ "ನೀನೊಬ್ಬಳು ನನ್ನ ಜೊತೆಗಿದ್ದರೆ ಸಾಕು!"
4.ದೇವರಿಗೆಂದು ಬಗೆಬಗೆಯ ತಿನಿಸುಗಳನ್ನು ಮಾಡುತಿದ್ದ ಅಜ್ಜಿಯನ್ನು, ಅಲ್ಲಿಯೆ ಇದ್ದ ಮೊಮ್ಮಗು ಕೇಳಿತು "ಮಕ್ಕಳೆ ದೇವರಲ್ಲವೆ ಅಜ್ಜಿ?!"
5.ವರದಕ್ಷಿಣೆಯಾಗಿ ತವರಿನಿಂದ ಚಿನ್ನವನ್ನು ತೆಗೆದುಕೊಂಡು ಬರಲು ಹಿಂಸಿಸುತ್ತಿದ್ದ ಗಂಡನ ವರ್ತನೆಯಿಂದ ಬೇಸರಗೊಂಡು ಯೋಚಿಸುತ್ತಿದ್ದವಳಿಗೆ, ಮದುವೆಯ ಮುಂಚಿನ ಅವನ ಮಾತುಗಳಾದ "ನೀನೆ ಚಿನ್ನ,ರನ್ನ" ಎಂಬುದರ ಅರ್ಥ ಆಗ ತಿಳಿಯಿತು
6. ಪುಣ್ಯಾರ್ಜನೆಗಾಗಿ ತೀರ್ಥಕ್ಷೇತ್ರಗಳಿಗೆ ಹೊರಟ ಮಗ, ಮನೆಯಲ್ಲಿ ಅನಾರೋಗ್ಯಪೀಡಿತ ತಂದೆತಾಯಿಗಳಿಬ್ಬರನ್ನೆ ಬಿಟ್ಟು!!
7. ಸ್ನೇಹಿತೆಯರೊಂದಿಗೆ 'ಮಹಿಳಾ ಸ್ವಾತಂತ್ರ್ಯದ' ಬಗ್ಗೆ ಮಾತನಾಡುತ್ತಿದ್ದ ಅತ್ತೆಯನ್ನು "ಎಲ್ಲರಿಗೂ ಕಾಫಿ ಮಾಡಿಕೊಡಲೇ ಅತ್ತೆ" ಎಂದು ಕೇಳಿದಳು ಸೊಸೆ!!
8. ನನಗೇನು ಆಸ್ತಿ ಮಾಡಿರುವೆ? ಎಂದು ಸಿಟ್ಟಿನಿಂದ ಕೇಳಿದ ಮಗನಿಗೆ ಅಪ್ಪ ಕೇಳಿದ "ಯಾರೂ ಕದಿಯಲಾಗದ ಆಸ್ತಿಯಾದ ವಿದ್ಯೆಯನ್ನೇ ಕೊಟ್ಟಿರುವಾಗ, ಬೇರೆ ಆಸ್ತಿ ಏಕೆ?!!!"
9. "ನನ್ನನ್ನು ನಂಬು ನಾನು ಏನೂ ತಪ್ಪು ಮಾಡಿಲ್ಲ" ಎಂದು ಎಷ್ಟು ಹೇಳಿದರೂ ಕೇಳಲಿಲ್ಲ ಅವಳನ್ನು ಮದುವೆಯಾಗಬೇಕಿದ್ದ ಹುಡುಗ.
"ನಂಬಿಕೆಯೇ ಇಲ್ಲ ಎಂದ ಮೇಲೆ ಮದುವೆ ಏಕೆ?" ಅವನನ್ನು ಬಿಟ್ಟು ಹೊರಟಳವಳು!!
10. ಅಂತರ್ಜಾತೀಯ ವಿವಾಹವನ್ನು ಮಾಡಿಕೊಂಡು ಬಂದ ಮಗನನ್ನು ಮನೆಯೊಳಗೆ ಸೇರಿಸಬೇಕೇ ಅಥವಾ ಬೇಡವೇ ಎಂದು ಯೋಚಿಸುತ್ತಿದ್ದ "ಬಸವ ತತ್ವಗಳ ಕಟ್ಟಾಭಿಮಾನಿ!"
- ವಿಜಯಲಕ್ಷ್ಮಿ ಎಂ. ಎಸ್
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ