ಶಾಲಾ ಡೈರಿ - 07

ಹೆಲೆನ್ ಕೆಲ್ಲರ್ ರವರ ಪರೀಕ್ಷಾನುಭವ (ಅವರೇ ಬರೆದಿರುವಂತೆ)

ನನ್ನ ಕಾಲೇಜು ಜೀವನದಲ್ಲಿ ಮುಖ್ಯವಾದ ತೊಡಕೆಂದರೆ ಪರೀಕ್ಷೆಗಳು. ಅವನ್ನು ಹಲವಾರು ಬಾರಿ ಎದುರಿಸಿದ್ದೇನೆ ಮತ್ತು ಅವನ್ನು ಮಟ್ಟ ಹಾಕಿದ್ದೇನೆ. ಆದರೆ ಅವು ಮತ್ತೆ ಮತ್ತೆ ಎದ್ದು ನಿಂತು ಪೇಲವವಾದ ಮುಖದೊಂದಿಗೆ ಪಿಡುಗಾಗಿ ಕಾಡಿದಾಗ ನನ್ನ ಧೈರ್ಯವು ಉಡುಗಿಹೋಗುತ್ತದೆ. 

ಈ ಅಗ್ನಿಪರೀಕ್ಷೆಗಳು ಆರಂಭವಾಗುವ ಮುನ್ನಾ ದಿನಗಳಲ್ಲಿ ನಿಮ್ಮ ತಲೆಯೊಳಗೆ ಫಾರ್ಮುಲಾಗಳನ್ನು, ಅಜೀರ್ಣಯುಕ್ತ ತಾರೀಖುಗಳನ್ನು ತುರುಕಿಕೊಳ್ಳಬೇಕಾಗುತ್ತದೆ. ಎಷ್ಟೆಂದರೆ, ನಿಮಗೆ, ಪುಸ್ತಕಗಳೂ, ವಿಜ್ಞಾನ ಮತ್ತು ನೀವು ಮೂವರು ಸಮುದ್ರದಾಳದಲ್ಲಿ ಮುಳುಗಿಹೋದರೆ ಚೆನ್ನ ಎನಿಸುವಷ್ಟು!

ಕೊನೆಗೂ ಆ ಭಯಾನಕ ಘಳಿಗೆ ಬರುತ್ತದೆ. ನೀವು ಸಿದ್ಧರಾಗಿದ್ದೀರಿ ಎನಿಸಿದರೆ, ನಿಮ್ಮ ಚಿಂತನೆಗಳು ನಿಮ್ಮ ತೀವ್ರ ಪ್ರಯತ್ನದ ಸಮಯದಲ್ಲಿ ನೆರವನ್ನು ನೀಡುತ್ತದೆ ಎನಿಸಿದರೆ ನೀವು ಅದೃಷ್ಟವೆಂತರೆನಿಸುತ್ತದೆ. ಬಹಳಷ್ಟು ಸಾರಿ ನಿಮಗನಿಸುವುದು ನಿಮ್ಮ ಕಹಳೆಯ ಕೂಗು ಉತ್ತರವಿಲ್ಲದೆ ಹೋಗಿಬಿಡುತ್ತದೆ. ನಿಮ್ಮ ನೆನಪು ಮತ್ತು ವಿವೇಚನೆ ನಿಮಗೆ ಅತ್ಯಂತ ಬೇಕೆನಿಸಿದಾಗ, ಅವುಗಳು ರೆಕ್ಕೆ ಕಟ್ಟಿಕೊಂಡು ಹಾರಿಹೋಗಿಬಿಟ್ಟಾಗ, ಅದು ಬಹಳ ಅಘಾತಕಾರಿಯಾಗಿರುತ್ತದೆ, ಶ್ರಮದಾಯಕವಾಗಿರುತ್ತದೆ. ಒಂದು ಘಳಿಗೆಯಲ್ಲಿ ನೀವು ಅನಂತ ಶ್ರಮದೊಂದಿಗೆ ಒಟ್ಟುಗೂಡಿಸಿದ್ದ ಅಂಶಗಳೆಲ್ಲಾ ನಿಮ್ಮನ್ನು ಬಿಟ್ಟುಹೋಗಿಬಿಡುತ್ತದೆ.

“ಹಸ್‍ರ ಬಗ್ಗೆ, ಅವರ ಕಾರ್ಯಗಳ ಬಗ್ಗೆ ಸಂಕ್ಷಿಪ್ತವಾಗಿ ಬರೆಯಿರಿ.” 
ಹಸ್? ಯಾರವರು? ಏನು ಮಾಡಿದರು? ಹೆಸರೇನೋ ಪರಿಚಿತವೆನಿಸುತ್ತದೆ. ನೀವು ನಿಮ್ಮ ಇತಿಹಾಸದ ವಾಸ್ತವಾಂಶಗಳ ಸಮೂಹವನ್ನೇ ಜಾಲಾಡುತ್ತೀರಿ, ಚಿಂದಿಬಟ್ಟೆಗಳ ಮೂಟೆಯಿಂದ ರೇಷ್ಮೆ ಚೂರನ್ನು ಹುಡುಕಿದಂತೆ. ನಿಮಗೆ ಆ ಹೆಸರು ಇಲ್ಲೇ ಇದೆ ಎನಿಸುತ್ತದೆ, ನೀವು ಅದನ್ನು ಇನ್ನೊಂದು ದಿನ ಸುಧಾರಣಾ ಯುಗದ ಆರಂಭದ ಬಗ್ಗೆ ಓದುತ್ತಿದ್ದಾಗ ಕಾಣಸಿಕ್ಕಿರುತ್ತದೆ. 

ಆದರೆ ಅದು ಈಗೆಲ್ಲಿ? ನೀವು ನಿಮ್ಮ ಇಡೀ ಜ್ಞಾನಭಂಡಾರ – ಕ್ರಾಂತಿಗಳು, ಯೋಜನೆಗಳು, ಹತ್ಯೆಗಳು, ಸರ್ಕಾರದ ಪದ್ಧತಿಗಳು – ಎಲ್ಲದರಲ್ಲಿಯೂ ಹುಡುಕುತ್ತೀರಿ. ಆದರೆ ಹಸ್, ಎಲ್ಲವನು? ಪರೀಕ್ಷಾ ಪತ್ರಿಕೆಯಲ್ಲಿರದ ಎಷ್ಟೊಂದು ವಿಷಯಗಳೂ ನಿಮಗೆ ಗೊತ್ತೆನಿಸುತ್ತದೆ. ಆಗ ನಿಮಗೆ ನಿರಾಶೆಯಲ್ಲಿ ಎಲ್ಲವನ್ನು ಕೊಡವಿಕೊಂಡಾಗ, ಅಲ್ಲಿ ಮೂಲೆಯಲ್ಲಿ ನಿಮಗೆ ಬೇಕಾದ ವ್ಯಕ್ತಿ ಕಾಣಿಸುತ್ತಾನೆ, ತನ್ನದೇ ಚಿಂತೆಯಲ್ಲಿ ಮಗ್ನನಾಗಿ, ನಿಮ್ಮ ಮೇಲೆ ಅವನು ತಂದಿರುವ ಆಪತ್ತಿನ ಅರಿವೇ ಇರದೆ! 

ಅಷ್ಟರಲ್ಲಿ ಕೋಣೆಯ ಮೇಲ್ವಿಚಾರಕರು ಬಂದು “ನಿಮ್ಮ ಸಮಯ ಮುಗಿದಿದೆ” ಎಂದು ತಿಳಿಸುತ್ತಾರೆ. ತೀವ್ರವಾದ ಬೇಸರದಿಂದ ಎಲ್ಲಾ ವಿಚಾರಗಳನ್ನು ಕೊಡವಿಕೊಂಡು ಮನೆಗೆ ಹೋಗುತ್ತೀರಿ. ನಿಮ್ಮ ತಲೆಯ ತುಂಬ ಪರೀಕ್ಷೆಗಳನ್ನು ನಿಷೇಧಿಸುವ, ವಿದ್ಯಾರ್ಥಿಗಳ ಒಪ್ಪಿಗೆ ಇಲ್ಲದೆ ಅವರನ್ನು ಪ್ರಶ್ನಿಸುವ ಪ್ರೊಫೆಸರ್‍ಗಳ ಹಕ್ಕನ್ನು ನಿಷೇಧಿಸುವ ಕ್ರಾಂತಿಕಾರಿ ಯೋಜನೆಗಳು ತುಂಬಿರುತ್ತವೆ!

ಅನುವಾದ - ಸುಧಾ ಜಿ