ಕವನ - ಝಾನ್ಸಿ ರಾಣಿ

ಝಾನ್ಸಿ ರಾಣಿ ಲಕ್ಷ್ಮೀಬಾಯಿಯವರದ್ದು ಎನ್ನಲಾದ ಚಿತ್ರ 

{ಈ ಚಿತ್ರವನ್ನು ನೋಡಿ ಬರೆದ ಕವನ}

ಒಳ ದುಮ್ಮಾನಕೊ  ರೋಷಕೊ  
ಪೂರ್ಣೇಂದು ವದನ ರುದ್ರ ಮೌನ 
ಬೇಗುದಿಯ ಸಂವಹನಕೆ
ಊಧ್ರ್ವ ದೃಷ್ಟಿ ಅನತಿ ದೂರಕೆ 

ಹಣೆಬಟ್ಟನಿಟ್ಟು ಓಲೆ ಮೂಬಟ್ಟು  
ತೊಟ್ಟು  ನೋವ ಅದುಮಿಟ್ಟರೂ  
ಮೂಗತುದಿ ತುಟಿಯಂಚಿನಲ್ಲಿ  
ದುಗುಡ  ಸೂಸಿಹ  ಮೊಗವೆನ್ನಲೆ?

ದೋಚಿ ಧೂಳಾಗಿಸಿದ ದಾಳಿಗೆ 
ತನ್ನತನವ ಕಸಿದ ದಾಸ್ಯಕೆ
ಕುದಿವ ಅಂತರಂಗಕೆ ಮುಸುಕ 
ಹೊದಿಸಿದ ಅಗ್ನಿಪರ್ವತವೆನ್ನಲೆ 

ಕಾಯ ಕಿಂಚಿತ್ತೂ ಕೆಡದಿರೆ 
ಘಾಸಿಗೊಂಡಿಹುದೆ  ಭಾವ 
ಹೃನ್ಮನದ ನಿಜ ನಿಲವ ಗಟ್ಟಿ 
ಗೊಳಿಸಿದೆಯೆ ನೆಟ್ಟ ನೋಟದೆ?

ಹೆರಳ ಕೆದರುತೆ  ಶಾಪ ನೀಡುವೆ  
ಯಾವ  ಧೂರ್ತ  ದುಶ್ಶಾಸನನಿಗೆ?
ಯಾವ ಕುಟಿಲ ಸಂಚಿನ ಕೂಟಕೆ? 
ಪರಕೀಯ ಕುನ್ನಿಯ ಬೊಗಳಿಗೆ 

 - ಕೆ. ಎಸ್. ಮಲ್ಲೇಶ್