ಶಾಲಾ ಡೈರಿ - ಅಬ್ರಹಾಂ ಲಿಂಕನ್‌ರವರ ಬರೆದಿದ್ದರೆನ್ನಲಾದ ಪತ್ರ

{ಶಿಕ್ಷಕರೆಲ್ಲರಿಗೂ ಶಿಕ್ಷಕರ ದಿನದ ಶುಭಾಶಯ ಕೋರುತ್ತಾ, ಸಮಾಜ ನಮ್ಮಿಂದ ಏನನ್ನು ಆಶಿಸುತ್ತದೆ ಎಂಬುದನ್ನು ತೋರಿಸುವ ಈ ಕವನವನ್ನು ಕಳಿಸುತ್ತಿದ್ದೇವೆ.}

ತಮ್ಮ ಮಗನ ಶಾಲಾ ಮುಖ್ಯೋಪಾಧ್ಯಾಯರಿಗೆ
ಅಮೇರಿಕದ ಅಧ್ಯಕ್ಷರಾಗಿದ್ದ ಅಬ್ರಹಾಂ ಲಿಂಕನ್‌ರವರ ಬರೆದಿದ್ದರೆನ್ನಲಾದ ಪತ್ರ

ಗೌರವನೀಯ ಗುರುಗಳೇ,
ನನಗೆ ಗೊತ್ತು, ನನ್ನ ಮಗ ಇದನು ಕಲಿಯಬೇಕೆಂದು -
ಎಲ್ಲರೂ ಸತ್ಯವಂತರಲ್ಲವೆಂದು,
ಎಲ್ಲರೂ ಪ್ರಾಮಾಣಿಕರಲ್ಲವೆಂದು;
ಆದರೆ ಅವನಿಗಿದನೂ ಕಲಿಸಿಕೊಡಿ -
ಪ್ರತಿ ಠಕ್ಕನಿಗೋರ್ವ ಧೀರನಿರುವನೆಂದು,
ಪ್ರತಿ ಸ್ವಾರ್ಥ ರಾಜಕಾರಣಿಗೋರ್ವ
ನಿಸ್ವಾರ್ಥ ನಾಯಕನಿರುವನೆಂದು.

ನನಗೆ ಗೊತ್ತು, ಇದಕೆ ಹೆಚ್ಚು ಸಮಯ ಬೇಕೆಂದು,
ಆದರೂ ಕಲಿಸಿ ಅವನಿಗೆ - ದುಡಿದೊಂದು
ರೂಪಾಯಿ, ದೊರೆತ ಐದಕ್ಕಿಂತ ಮಿಗಿಲೆಂದು.
ಕಲಿಸಿ ಅವನಿಗೆ ಸೋಲುವುದನು,
ಜೊತೆಗೆ ಜಯದಲಿ ಸುಖಿಸುವುದನು.

ಸಾಧ್ಯವಾದರೆ ಕಲಿಸಿ ಅವನಿಗೆ
ದೂರವಿರಿಸಲು ಅಸೂಯೆಯನು.
ಸಾಧ್ಯವಾದರೆ ಕಲಿಸಿ ಅವನಿಗೆ
ಮಂದಹಾಸದ ಮಹತ್ವವನು.
ಕಲಿಯಲತಿ ಬೇಗ - ಪೀಡಕರನು
ಸದೆಬಡಿವುದು ಸುಲಭವೆಂಬುದನು.

ತಿಳಿಸಿರಿ ಅವನಿಗೆ, ಪುಸ್ತಕಲೋಕದ ವಿಸ್ಮಯವನು;
ಜೊತೆಗೆ, ಅರಿಯಲು ಕೊಡಿ ಸಮಯವನು -
ಬಾನಂಗಳದ ಹಕ್ಕಿಗಳನು, ಹಗಲಿನ ದುಂಬಿಗಳನು,
ಹಸಿರು ಬೆಟ್ಟದ ಸುಮಗಳ ನಿತ್ಯನೂತನ ಮರ್ಮವನು.

ಕಲಿಸಿರಿ ಅವನಿಗೆ ಶಾಲೆಯಲಿ
ವಂಚನೆಗಿಂತ ಫೇಲಾಗುವುದೇ ಮೇಲೆಂದು.
ಎಲ್ಲರೂ ತಪ್ಪೆಂದರೂ, ತನ್ನ ವಿಚಾರಗಳಲಿ
ದೃಢ ನಂಬಿಕೆ ಇಡಲೇಬೇಕೆಂದು.

ಕಲಿಸಿರವನಿಗೆ, ಮೃದುಜನರಲಿ ಹಿತವಾಗಿರಬೇಕೆಂದು,
ನಿಷ್ಠುರರಲಿ, ದೃಢತೆ ಬೇಕೆಂದು.
ಕೊಡಿರಿ, ಗೆದ್ದೆತ್ತಿನ ಬಾಲವ ಹಿಡಿವವರನ್ನು
ಹಿಂಬಾಲಿಸದಿರುವ ಅದಮ್ಯ ಶಕ್ತಿಯನು,
ಕಲಿಸಿರಿ ಎಲ್ಲರ ಮಾತನಾಲಿಸುವುದನು;
ಆದರೆ, ಸೋಸಿ ಸತ್ಯದ ಜಾಲರಿಯಲ್ಲದನು,
ಸರಿಯಾದುದನೇ ಸ್ವೀಕರಿಸುವುದನು.

ಕಲಿಸಿರಿ ಅವನಿಗೆ, ನೋವಲೂ ನಗಬೇಕೆಂದೂ,
ಕಣ್ಣೀರಿನಲಿ ಅವಮಾನವಿಲ್ಲೆಂದು.
ಸಿನಿಕರನು ಧಿಕ್ಕರಿಸಬೇಕೆಂದು,
ಅತಿ ಸಿಹಿಮಾತಲಿ ಎಚ್ಚರಿರಬೇಕೆಂದು.
ಕಲಿಸಿರವನಿಗೆ, ಹೆಚ್ಚು ಹಣಕೆ
ಶಕ್ತಿ-ಬುದ್ಧಿ ಬಲ ಮಾರಿಕೊಳಬಹುದೆಂದು,
ಆದರೆ, ತನ್ನಾತ್ಮ - ಹೃದಯಗಳಿಗೆ ಬೆಲೆ ಕಟ್ಟಬಾರದೆಂದು.
ಊಳಿಡುವ ಗುಂಪಿಗೆ ಕಿವಿಗೊಡಬಾರದೆಂದು,
ತನ್ನದು ಸರಿಯಿದ್ದಾಗ, ಎದ್ದು ಹೋರಾಡಬೇಕೆಂದು.

ಕಲಿಸಿರವನಿಗೆ ಮೃದುವಾಗಿ,
ಆದರೆ, ಅತೀ ಮುದ್ದಿಸಬೇಡಿ.
ಬೆಂಕಿಯಲಿ ಕಾಯುತ್ತಾ ನಿಧಾನವಾಗಿ
ಉತ್ಕೃಷ್ಟ ಉಕ್ಕಾಗಲು ಬಿಡಿ.
ಮುನ್ನುಗುವ ಧೈರ್ಯ ಬರಲಿ,
ಸಾಹಸಿಯಾಗುವ ಸ್ಥೈರ್ಯವಿರಲಿ.

ಕಲಿಸಿರಿ ನೀವವನಿಗೆ,
ಅಗಾಧ ಭರವಸೆಯಿಡಲು ತನ್ನಲ್ಲಿ,
ಆಗಲೇ ಸಾಧ್ಯ ಅವನಿಗೆ
ಪ್ರಗಾಢ ನಂಬಿಕೆಯಿಡಲು ಮನುಕುಲದಲ್ಲಿ.

ಬಹುದೊಡ್ಡ ಆದೇಶವಿದು;
ನೋಡಿ, ಏನು ಮಾಡಬಹುದೆಂದು. . . . .
ಕೋಮಲ ಮನದ ಪೋರನವನು,
ಕಿಶೋರ ನನ್ನವನು.

- ಅನುವಾದ - ಸುಧಾ ಜಿ ಮತ್ತು ಉಷಾಗಂಗೆ