ಅನುವಾದಿತ ಕವಿತೆ - ಮಾತುಕತೆ

ನಿಲ್ಲದಿರಲಿ ಮಾತುಕತೆ
ಮಾತಿನಿಂದ ಮಾತಿಗೆ ನಡೆಯುತಿರಲಿ ಕತೆ ||
ನಡೆಯುತಿರಲಿ ಮಾತುಕತೆ ಹಗಲು ರಾತ್ರಿ
ನಮ್ಮತ್ತ ನಗು ಬೀರುವ, ತಾರೆಗಳು ತುಂಬಿದ ರಾತ್ರಿ ಸಾಗುತಿರಲಿ||

ಮಾತುಗಳಲಿ ಕೊಂಚ ಬೈಗುಳವಿದ್ದರೆ ಇರಲಿ ಬಿಡು
ವಿಷದ ಬಟ್ಟಲು ತುಳುಕುತ್ತಿದ್ದರೆ ತುಳುಕಲಿ ಬಿಡು
ವ್ಯಂಗ್ಯವಾಡರಲಿ ಕಣ್ಣು, ಗಂಟಿಕ್ಕದಿರಲಿ ಹುಬ್ಬು.
ಏನಾದರಾಗಲಿ, ಹೃದಯ ಮಿಡಿಯುತಿರಲಿ.
ಬೇಸರವು ಬಂಧಿಸದಿರಲಿ ಮಾತನ್ನು ಸಂಕೋಲೆಯಲಿ
ಯಾರೊ ಕೊಲೆಗಾರ ನಮ್ಮ ಮಾತನ್ನು ಮುಗಿಸದಿರಲಿ ||

ಬೆಳಗಾಗುವ ಮುನ್ನ ಮೂಡುವುದು ಭರವಸೆ;
ಪ್ರೀತಿ ಹುಟ್ಟುವುದು, ಮೈ ನಡುಗುವುದು
ತುಟಿ ಅದುರುವುದು, ಹೃದಯ ಬಡಿಯುವುದು,
ಕಣ್ಣು ಕೆಳಗಾಗುವುದು; ತುಟಿ ಮೇಲಿನ ಮುತ್ತಿನಂತೆ
ಮೌನ ಸವಿಯಾಗುವುದು, ಹೂವರಳುವ ದನಿ ಮಾತ್ರ ಕೇಳುವುದು||

ಆಗಬೇಕಿಲ್ಲ ಮಾತುಕತೆ, ದನಿಯೂ ಬೇಕಿಲ್ಲ
ದ್ವೇಷ ಕರಗುವುದು, ಪ್ರೀತಿ ಮನೆ ಮಾಡುವುದು.
ಕರದಲ್ಲಿ ಕರವಿಡು, ಜಗವೆಲ್ಲಾ ಜೊತೆಯಾಗುವುದು.
ದುಃಖದ ಬರಡು ದಾರಿಯನು ದಾಟಿ ಬರುವೆವು
ನಾವು ರಕ್ತದ ನದಿಯನು ಹಾದು ಹೋಗುವೆವು ||

ನಿಲ್ಲದಿರಲಿ ಮಾತುಕತೆ
ಮಾತಿನಿಂದ ಮಾತಿಗೆ ನಡೆಯುತಿರಲಿ ಕತೆ ||
ನಡೆಯುತಿರಲಿ ಮಾತುಕತೆ ಹಗಲು ರಾತ್ರಿ
ನಮ್ಮತ್ತ ನಗು ಬೀರುವ, ತಾರೆಗಳು ತುಂಬಿದ ರಾತ್ರಿ ಸಾಗುತಿರಲಿ||

- ಎಸ್.ಎನ್.ಸ್ವಾಮಿ

ಮೂಲ: ಸರ್ದರ್ ಜಫ್ರಿ