ನಮ್ಮ ವೈವಾಹಿಕ ರೀತಿನೀತಿಗಳಲ್ಲಿ ಪರಸ್ಪರ ಇಷ್ಟಪಟ್ಟು ಅವರ ಕಷ್ಟ ಸುಖಗಳನ್ನು ಹಂಚಿಕೊಂಡು ಅವರೇ ನಿರ್ಧಾರ ತೆಗೆದುಕೊಂಡು ಮದುವೆಯಾಗುವ ಪದ್ದತಿ ಇನ್ನೂ ಬಂದಿಲ್ಲ. ಈಗಲೂ ಹುಡುಗಿಯ ಅಂದ ಚಂದವೇ ಮಾತಿನ ವಸ್ತು. ಆ ಕೂಸು ತುಂಬಾ ಚಂದ ಇದ್ದಡೆ!! ಇಬ್ಬರೂ ಇಂಜಿನಿಯರಿಂಗ್, ಮೆಡಿಕಲ್ ಓದಿ ಅಥವಾ ಉನ್ನತ ವಿದ್ಯಾಭ್ಯಾಸ ಹೊಂದಿ ಕೆಲಸದಲ್ಲಿದ್ದರೂ ಮಾತಿನ ವರಸೆ ಬದಲಾಗಿಲ್ಲ! ಇದು ಕೇವಲ ಧಾಟಿ ಅಲ್ಲ!! ದೃಷ್ಟಿ ಕೋನ!
ಹೆಣ್ಣು ಎಂದರೆ ಅಂದ, ಚಂದ ಮದುವೆಗೆ ಸಿದ್ಧಳಾದವಳು; ಆಕೆಯ ವರನಾಗುವವನನ್ನು ಮೆಚ್ಚಿಸಿ ಆತನ ಬೇಕು ಬೇಡಗಳನ್ನು ಪರಿಗಣಿಸಬೇಕಾದವಳು; ಅಷ್ಟೇ ಅಲ್ಲದೆ ಆತನ ಸುಖ ಸೌಖ್ಯವೇ ಆಕೆಯ ಉಸಿರು. ನಂತರದ ಪೀಳಿಗೆಯ ಸೃಷ್ಟಿಕರ್ತಳು, ಅದರಲ್ಲೂ ಕುಲದೀಪಕನನ್ನು ಹಡೆಯಬೇಕಾದವಳು. ಇದೇ ಪರಂಪರೆ ಕಳೆದ ಸಾವಿರಾರು ವರ್ಷಗಳದ್ದು! ಇದರಲ್ಲಿ ಸ್ವಲ್ಪ ಲೋಪವಾದರೂ ಅದೊಂದು ವಿಚಿತ್ರ!
ಬಾಲ್ಯದಿಂದ ಆಕೆಯ ವೈವಾಹಿಕ ಅವಧಿಯವರೆಗೆ, ಈ ಆಧುನಿಕ ಯುಗದಲ್ಲೂ ಅಷ್ಟರಮಟ್ಟಿಗೆ ಸ್ವತಂತ್ರವಾಗಿರುವ ಆಕೆಯ ಬದುಕು ನಂತರ ರಿಮೋಟ್ ಕಂಟ್ರೋಲ್‌ ಗೊಳಪಟ್ಟಂತೆ! ಆಕೆಯ ಪತಿರಾಯನ ಆಸೆ, ಆಕಾಂಕ್ಷೆಗೆ ತಕ್ಕಂತೆ ಅವಳ ಅಭಿರುಚಿಯೂ ಬದಲಾಗಬೇಕು. ಉದ್ಯೋಗ ಮುಗಿಸಿ ಬಂದ ರಾಯನನ್ನು ನೋಡಿಕೊಂಡು ತನ್ನ ಮಗುವಿನ ಜೊತೆಗೆ ಈತನೂ ದೊಡ್ಡ ಮಗು ಎಂಬುದಾಗಿ ಮಮಕಾರ ಮಾಡುತ್ತಾ ದೊಡ್ಡ ತಾಯ್ತನದ ಮೆರುಗಲ್ಲಿ ಲೋಕಕ್ಕೆಲ್ಲಾ ಮಿರುಗುತ್ತಾ, ಕೊರಗುವ ಆಧುನಿಕ ಮಹಿಳೆಯರು ಅದೆಷ್ಟೋ!! ತಮ್ಮ ವಿದ್ಯಾಭ್ಯಾಸ, ವೃತ್ತಿಪರತೆ, ವ್ಯಕ್ತಿತ್ವವನ್ನು ಬದಿಗೊತ್ತಿ ಗಾಜಿನರಮನೆಯಲ್ಲಿ ಬದುಕುವ ವಿದ್ಯಾವಂತ, ಯುವತಾಯಂದಿರ ಬದುಕೇನೂ ತುಂಬಾ ಬದಲಾವಣೆಯನ್ನು ಹೊಂದಿಲ್ಲ!
ಹಾಗಾದರೆ ಬದಲಾವಣೆಗೊಳಪಡುವುದು ಬೇಕಾಗಿಲ್ಲವೇ?! ಆಧುನಿಕ ಯಂತ್ರ ಸಾಮಗ್ರಿಗಳು ಅಡುಗೆ ಇನ್ನಿತರ ಗೃಹ ಕೃತ್ಯಗಳನ್ನು ಸುಲಭಗೊಳಿಸಿರಬಹುದು! ಕನಿಷ್ಠ ಎರಡು ಗಂಟೆಗಳಲ್ಲಿ ಮನೆಯ ಸಂಪೂರ್ಣ ಕೆಲಸ ಮಾಡಿ ಮುಗಿಸಬಲ್ಲರು. ಆದರೆ ಅವಳ ಉತ್ಪಾದನಾ ಕ್ಷೇತ್ರ ಬದಲಾಗಬೇಕಲ್ಲವೇ? ಅವಳ ಸರ್ವಸ್ವವೂ ಕುಟುಂಬಕ್ಕೆ ಮೀಸಲಾಗಿಡಬೇಕೇ? ಅವಳು ಕಲಿತ ವಿದ್ಯೆ, ಅಭಿರುಚಿಯನ್ನು ಹೊಂದಿ ಸಾಮಾಜಿಕ ಪಾಲ್ಗೊಳ್ಳುವಿಕೆ, ತೊಡಗುವಿಕೆಗೆ ಅವಕಾಶ ಎಲ್ಲಿಯದು? ಇಲ್ಲಿ ಕಾಣುವುದು ಬೆರಳೆಣಿಕೆಯ ಮಂದಿ. ಅದೇ ಹಳೆಯ ಚೌಕಟ್ಟಿನ ದೃಷ್ಟಿಕೋನವನ್ನು ಮೆಟ್ಟಿ ನಿಲ್ಲಲು ಹೆಣ್ಣುಮಕ್ಕಳು ಮುಂಬರಬೇಕು, ಸವಾಲುಗಳನ್ನು ಸ್ವೀಕರಿಸಬೇಕು.
- ಸಂಧ್ಯಾ ಪಿ ಎಸ್
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ