ಪುಟ್ಕಥೆಗಳು

ಪುಟ್ಕಥೆ - 1

"ಹಾ...ನೋಟಾ ಬಟನ್ ಒತ್ತಿದಿರಾ?" ಆಶ್ಚರ್ಯದಿಂದ ಕೇಳಿದಳು ಪತ್ರಕರ್ತೆ.

"ಹೌದು ಮಗಾ, ಇನ್ನೇನು ಮಾಡಲಿ? ಇಷ್ಟು ವರ್ಷಗಳಿಂದ ಒಂದು ಪಕ್ಷವಲ್ಲ ಒಂದು ಪಕ್ಷ ನಮ್ಮ ಸಮಸ್ಯೆಗಳನ್ನು ಬಗೆಹರಿಸುತ್ತದೆ ಎಂದು ಕಾದಿದ್ದೆ, ಇನ್ನು ಕಾಯುವ ತಾಳ್ಮೆಯಿಲ್ಲ, ಇವರಲ್ಲಿ ಯಾರೂ ಯೋಗ್ಯರಲ್ಲ" ಉತ್ತರಿಸಿದರು ೯೦ ವರ್ಷದ ಅಜ್ಜಿ!!

ಪುಟ್ಕಥೆ - 2

"ಸಂಪಾದನೆ ಮಾಡಿದ್ದನ್ನೆಲ್ಲಾ ಹೀಗೆ ಬೇರೆಯವರಿಗೆ ಖರ್ಚು ಮಾಡುತ್ತಾ ಹೋದರೆ ಉಳಿಯುವುದು ಏನು?" ಕೇಳಿದಳು ಗೆಳತಿ.

"ಅಗಾಧ ಪ್ರೀತಿ..... ಬದುಕಿಗಷ್ಟು ಸಾಲದೇ?!" ಕೇಳಿದಳೀಕೆ.

 ಪುಟ್ಕಥೆ - 3

"ಸೈಕಲ್ ತಗೊಂಡು ಬಾ ಅಂದ್ರೆ ಕುಡಿದು ಬಂದು ಬಿದ್ದವ್ನೆ" ಮಗ ತಿರಸ್ಕಾರದಿಂದ ನುಡಿದ. 
ಅದನ್ನು ಕೇಳಿ ಸೈಕಲ್ ಗಾಗಿ ಇಡೀ ದಿನ ಊಟವಿಲ್ಲದೆ ದುಡಿದು, ಹಣ ಸಾಕಾಗಲಿಲ್ಲವೆಂದು ರಕ್ತ ನೀಡಿ, ಅಂಗಡಿಯಲ್ಲಿ ಆರ್ಡರ್ ಕೊಟ್ಟು ಬಂದು ನಿತ್ರಾಣವಾಗಿ ಕುಸಿದು ಬಿದ್ದಿದ್ದ ತಂದೆಯ ಜೀವ ವಿಷಾದದ ನಗೆ ಬೀರಿತು!!

ಪುಟ್ಕಥೆ - 4

"ಈ ರಾಜಕೀಯ ಎಷ್ಟು ಹೊಲಸು, ಛೀ, ಏನು ಈ ಅಧಿಕಾರಕ್ಕಾಗಿ ಕಚ್ಚಾಟ?" ತಂದೆ ಗೊಣಗುತ್ತಿದ್ದ.

"ಈ ಬುದ್ಧಿ ಕಾಸು ತಗೊಂಡು ಓಟು ಹಾಕುವ ಮುನ್ನ ಇರಬೇಕಿತ್ತು" ಮಗಳು ಹೇಳಿದಳು!!

ಪುಟ್ಕಥೆ - 5

"ಅವರಿಗ್ಯಾಕೆ ಹಣ ಕೊಡ್ತೀರಾ" ಕೇಳಿದರಾಕೆ.

"ಇನ್ನೇನು ಮಾಡುವುದು ಮೇಡಮ್, ಪಾಪ ಅನಿಸುತ್ತೆ. ಈ ತೃತೀಯಲಿಂಗಿಗಳನ್ನು ಯಾರು ಕೆಲಸಕ್ಕೆ ಇಟ್ಟುಕೊಳ್ಳುತ್ತಾರೆ, ಅವರಿಗೆ ಇನ್ನೇನು ದಾರಿ ಇದೆ. ಸೆಕ್ಸ್ ವರ್ಕರ್ಸ್ ಆಗಿ ಕೆಲಸ ಮಾಡುವುದಕ್ಕಿಂತ ಭಿಕ್ಷೆ ಬೇಡುವುದು ವಾಸಿ ಬಿಡಿ" ಉತ್ತರಿಸಿದನಾತ.

"ನಾನು ಅದೇ ಸಮುದಾಯಕ್ಕೆ ಸೇರಿದವಳೇ" ಉತ್ತರಿಸಿದರಾಕೆ.

ತನ್ನ ಕಾಲೇಜಿನ ಕಾರ್ಯಕ್ರಮಕ್ಕೆ ಆಕೆಯನ್ನು ಮುಖ್ಯ ಅತಿಥಿಯಾಗಿ  ಕರೆದೊಯ್ಯುತ್ತಿದ್ದಾತ ಶಾಕ್ ಗೆ ಒಳಗಾದ!!

ಪುಟ್ಕಥೆ - 6

ಅವಳ ಬಗ್ಗೆ ಶಾಲೆಯಿಂದ ಮನೆಗೆ ದಿನಾಲೂ ಒಂದು ದೂರು.  ಮುಖ್ಯೋಪಾಧ್ಯಾಯರಿಂದ ತಂದೆಗೆ ಕರೆ. ಯಾರ ಮಾತನ್ನೂ ಕೇಳದ ಅವಳು ಅಂದು ಬದಲಾಗಿಬಿಟ್ಟಳು, ಅದಾದ ನಂತರ ಶಿಕ್ಷಕರ ಕಣ್ಮಣಿಯಾದಳು.‌
ಇಷ್ಟಕ್ಕೆಲ್ಲಾ ಕಾರಣವಾದದ್ದು ಅವಳ ತಂದೆಯ ಬೈಗುಳವಲ್ಲ,......... ಕಣ್ಣೀರು!!

ಪುಟ್ಕಥೆ - 7

ಯಾವ ಕೈಯನ್ನವಳು ಅಂದು ಹಿಡಿದಿದ್ದಳೊ ಆ ಕೈಯ ಗುರುತು ಇಂದವಳ ಕೆನ್ನೆಯ ಮೇಲಿತ್ತು.

ಯಾವ ಮಡಿಲನ್ನವಳು ಅಂದು ಧಿಕ್ಕರಿಸಿ ಹೋಗಿದ್ದಳೊ ಅದವಳಿಗೆ ಇಂದು ಆಶ್ರಯ ನೀಡಿತ್ತು!

ಪುಟ್ಕಥೆ - 8

ಸ್ನೇಹಿತೆ ಹೊಸ ಊರಿಗೆ ಓದಲು ಹೋದಾಗ ಇವಳಿಗೆ ಆತಂಕವಾಗಿತ್ತು, ತನ್ನನ್ನು ಮರೆತುಬಿಟ್ಟು ಹೊಸ ಸ್ನೇಹಿತರನ್ನು ಹುಡುಕಿಕೊಳ್ಳುತ್ತಾಳೆಂದು. ರಜೆಗೆ ಬಂದಾಗ ಇಬ್ಬರು ಗೆಳತಿಯರೊಂದಿಗೆ ಬಂದಾಗ ಇವಳಿಗದು ಖಚಿತವಾಯಿತು.

ಆದರೆ ಎರಡೇ ದಿನಗಳಲ್ಲಿ ಅವಳ ಅನುಮಾನ ದೂರವಾಯಿತು, ಆ ಹೊಸ ಗೆಳತಿಯರು ಇವಳೆಡೆಗೆ ತಮ್ಮ ಸ್ನೇಹಹಸ್ತ ಚಾಚಿದಾಗ!!

   

ಪುಟ್ಕಥೆ - 9

"ಅಕ್ಕ ಇನ್ನೂ ಎಷ್ಟು ದಿನ ಅಂತಾ ದುಡೀತೀಯ, ನನ್ನ ಜೊತೆ ಬಂದಿರು" ೮೦ ವರ್ಷದ ಅಕ್ಕನನ್ನು ೭೦ ವರ್ಷದ ತಂಗಿ ಕರೆದಳು.

"ಕೈಯಲ್ಲಿ ಕಸುವಿರುವಾಗ ಕೈಕಟ್ಟಿ ಕೂರಬಾರದಮ್ಮ, ಕೈಲಾಗಾದಾಗ ನಿನ್ನ ಹತ್ತಿರವೇ ಬರುವೆ."

ಇಬ್ಬರ ಸಂಭಾಷಣೆ ಕೇಳಿ ೧ ಘಂಟೆ ಕೆಲಸ ಮಾಡಿದರೆ ೨ ಘಂಟೆ ಸುಧಾರಿಸಿಕೊಳ್ಳುವ ೨೦ ವರ್ಷದ ನಾನು ಬೆಬ್ಬೆರಗಾದೆ!!

ಪುಟ್ಕಥೆ - 10

"ಮೇಡಮ್ ನೀವು ಯಾಕೆ ಕ್ಲಾಸಿಗೆ ಬನ್ನಿ, ದಿನಾ ಓದಿ ಎನ್ನುತ್ತಿದ್ದಿರಿ ಅಂತ ಈಗ ಅರ್ಥ ಆಯ್ತು. ಪದವಿ ಪರೀಕ್ಷೆಗೆ ಕಂಠಪಾಠ ಮಾಡಿ ಪಾಸಾಗಿದ್ದು, ಉದ್ಯೋಗಕ್ಕಾಗಿನ ಯಾವ ಸ್ಪರ್ಧಾತ್ಮಕ ಪರೀಕ್ಷೆಗೂ ಉಪಯೋಗವಾಗ್ತಿಲ್ಲ. ಮತ್ತೆ ಮೊದಲಿನಿಂದ ಓದಬೇಕಾಗಿದೆ!" ಅಳಲು ತೋಡಿಕೊಂಡ ವಿದ್ಯಾರ್ಥಿ.

- ಸುಧಾ ಜಿ