ಜಾಗೃತಿ ಗೀತೆ - ಗೋಡೆ ಕೆಡವಬೇಕಣ್ಣ

ಗೋಡೆ ಕೆಡವಬೇಕಣ್ಣ

ನಾವು ಗೋಡೆ ಕೆಡವಬೇಕಣ್ಣ||2||

ಜಾತಿ-ಜಾತಿಗಳ ನಡುವಿನ ಗೋಡೆ

ಧರ್ಮ-ಧರ್ಮಗಳ ನಡುವಿನ ಗೋಡೆ

ಭಾಷೆ- ಭಾಷೆಗಳ ನಡುವಿನ ಗೋಡೆ

ಬೇಗ ಕೆಡವಬೇಕಣ್ಣ

ಈ ಗೋಡೆ ಕೆಡವಬೇಕಣ್ಣ

ಮೇಲು-ಕೀಳು ಎನ್ನುವ ಗೋಡೆ

ಬಡವ-ಬಲ್ಲಿದ ಎನ್ನುವ ಗೋಡೆ

ಗಂಡು-ಹೆಣ್ಣು ಎನ್ನುವ ಗೋಡೆ

ಕುಟ್ಟಿ ಕೆಡವಬೇಕಣ್ಣ

ಈ ಗೋಡೆ ಕೆಡವಬೇಕಣ್ಣ

ತಮ್ಮ ಬೇಳೆಯನು ಬೇಯಿಸಿಕೊಳ್ಳಲು

ಕೆಲವು ಕಳ್ಳರು ಕಟ್ಟುವ ಗೋಡೆ

ನಾವು ನೀವು ಒಂದಾಗದೆ ಇರಲು

ನಮ್ಮಯ ನಡುವೆ ಕಟ್ಟಿದ ಗೋಡೆ

ಒಡೆದು ಕೆಡವಬೇಕಣ್ಣ

ಈ ಗೋಡೆ ಕೆಡವಬೇಕಣ್ಣ

ಊರು ಎನ್ನದೆ, ಕೇರಿ ಎನ್ನದೆ

ಮೇಲು  ಎನ್ನದೆ,ಕೀಳು ಎನ್ನದೆ

ಒಡೆದು ಹೋದ ಜನರೆಲ್ಲರು ಸೇರಿ

ನಮ್ಮ ಒಗ್ಗಟ್ಟು ಮುರಿಯೋ ಹುಳಗಳ 

ಹೊಸಕಿ ಹಾಕಬೇಕಣ್ಣ,ಇವರ ಗೋರಿ ಕಟ್ಟಬೇಕಣ್ಣ

ಗೋರಿ ಕಟ್ಟಬೇಕಣ್ಣ, ದುರುಳರ ಗೋರಿ ಕಟ್ಟಬೇಕಣ್ಣ

- ರಘುನಂದನ