ಎಲ್ಲರ ಬಯಕೆಯೂ
ಹರಕೆಯೂ ಅದೇ
ಗಂಡು ಮಗುವಾಗಲಿ
ಗಂಡು ಮಗುವಾಗಲಿ
ತನ್ನವರು ಬಂಧುಗಳು
ಪರಿಚಿತರು ಇತರರು
ಅರೆ ಒಬ್ಬರ ಬಾಯಲ್ಲೂ
ಹೆಣ್ಣಾಗಲಿ ಎಂಬಮಾತೆ ಬರದಲ್ಲ?
ಆಗುವುದೋ ಬಿಡುವುದೋ
ಮೊದಲು ಗಂಡಾದರೆ ಚೆನ್ನ
ಆನಂತರ ಬೇಕಾದರೆ ಹೆಣ್ಣಾಗಲಿ
ಹೆಣ್ಣಿಗೆ ದ್ವಿತೀಯ ಆದ್ಯತೆ
ಹೆಣ್ಣೆ ತನ್ನತನಕೆ ಜನುಮ ನೀಡಲು
ಹಿಂಜರಿಯುತ್ತಿದ್ದಾಳೆ ಇನ್ನು.
ಈ ನವಯುಗದಲೂ ಅವಳು
ಸಿದ್ಧಳಿಲ್ಲ ಮಗಳನ್ನು ಹೆರಲು.
ತನ್ನ ಅಸ್ತಿತ್ವಕೆ ಬೆಲೆಯಿಲ್ಲವೆಂದು ಒಪ್ಪಿಸಿಬಿಟ್ಟಿದ್ದಾಳೆ ....ತನ್ನನ್ನು.
ಅವಳ ಉಗಮವನೆ ತಿರಸ್ಕರಿಸುವ
ಅವಳ ಏಳಿಗೆಯನೆ ಸಹಿಸದಿರುವ
ಅವಳ ಸ್ಪರ್ಧೆಗೆ ಹೆದರಿರುವ
ಅವಳ ಸಾತ್ವಿಕ ಶಕ್ತಿಯ ಒಪ್ಪದಿರುವ
ಅವಳ ಬಂಧಿಸಿ ಅಡಿಯಾಳಾಗಿಸುವ
ಕೀಳರಿಮೆಯ ಗಂಡುಸಮಾಜಕೆ
ಸವಾಲೊಡ್ಡುತ ಮೇಲೇಳು ಮಹಿಳೆ
ಇಂದು ಈ ಕ್ಷಣದಂದು
- ಉಷಾಗಂಗೆ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ