ಕವನ - ಮಳೆ

ಅಬ್ಬ ! ಈ ಸಿಡಿಲು ಗುಡುಗುಗಳ ದನಿಯಿದುವೆ ಕೇಳಿ
ಒಡಲಿಂದ ಬಡಿಬಡಿದು ಮೋಡವನೆ ಸೀಳಿ
ದೂರ ದೂರದಿಂ ಹಾರಾಡಿ ಮೊರೆಯಿಡುತ
ಸಾರುವುದು ಮೊದಲಾಗಿ ಮಳೆಗರೆಯುತ||   1

ಓಡೋಡಿ ಬರುತಿರುವ ಕಪ್ಪನೆಯ ಮೋಡ
ಗೂಡಿನಲಿ ಕುಳಿತಿಹುದು ಗುಬ್ಬಚ್ಚಿ ನೋಡ 
ಗಾಳ ಹಾಕದೆ ನೊಣಕೆ ಬಾಯ್ಬಿಡದೆ
ನೆನೆನೆದು ದುಃಖಪಡುತಲಿಹ ಜೇಡ||  2

ಅಬ್ಬರಿಸಿ ಬರುತಲಿಹ ಗಾಳಿಯನು ನೋಡ
ಬೆಬ್ಬರಿಸಿ ಓಡುತಿಹ ಧೂಳಿನಲಿ ಮೋಡ
ನಾಡು ನಾಡಿಂದ ಹರಿದಾಡಿ ಬಾಗುತಿಹ
ಬೆಳೆಮರವು ಸ್ವಾಗತವ ನೀಡುವುದು ನೋಡ||  3

ಮೇಲೆ ಮೇಲಿಂದ ಬೀಳುತಿಹ ಮಳೆಯು
ಮೂಲೆ ಮೂಲೆಗಳಿಂದ ಕೇಳುತಿಹ ಗಾಳಿ
ಛಳಿಯ ಮೈನಡುಕದಲಿ ಒದರದಿಹ ಗೂಳಿ
ಹಳಿಯುವುದು ಬಯಸುವುದು ಮೇಲಾದ ಬಿಸಿಲು||   4

ದಿನದಿನಕೆ ಬಿಡದಿಹುದು ಹಿಡಿದಿಹುದು ಮಳೆಯು
ಎಂದಿಗಿದು ಮುಕ್ತಾಯಗೊಳುವುದೊ ಛಳಿಯು
ಮುದುರಿ ಕುಳಿತಿಹ ಜನಕೆ ಹುಮ್ಮಸವ ತರಲಿ
ಚದುರಿ ಜಡತೆಯು ಮನಕೆ ಮುದವು ಬರಲಿ ….  5

      - ಜಿ ಗಂಗಾಧರಯ್ಯ